عفراء علوي محمدي- كود//

من بعد 4 شهور ونص على إعلان المغرب تطبيع علاقاتو مع إسرائيل، وفتح مكتب الاتصال الاسرائيلي فالمغرب برئاسة السفير ديفيد كَوفرين، مغاربة بزاف كيتساءلو على إمكانية السفر للدولة العبرية، وواش بالفيزا ولا بلا فيزا، وشكون اللي غتكون عندو الأسبقية.

“كود” جابت معطيات حصرية على هذشي من بعد حديثها مع مسؤولين فإسرائيل ويهود مغاربة هنا، وتبين أن لحد الساعة، مازال ماكاين حتى قرار رسمي نهائي، وهذشي فرضاتو الوضعية الوبائية دفيروس كورونا المستجد.

لكن فالمقابل، مصادر “كود” كشفات أن الفيزا غتكون مفروضة على الطرفين، ولو غير فهذ المرحلة الأولى، وكيخص المسافرين يكونو دايرين الجرعات الجوج ديال اللقاح، إلا لقاح أسترازينيكا اللي مامقبولش، بالإضافة لأن المسافرين ملزمين بتحاليل PCR قبل الديكولاج وبعد الوصول، بالإضافة ل”التيست سيرولوجيك”.

وفالوقت اللي مصدر من إسرائيل كشف أن اليهود المغاربة هنا ولهيه هوما اللي غتكون عندهم الاولوية دالسفر، وخصوصا اللي عندهم واحد من أسرتهم المقربة فالبلد اللي عوالين يمشيو ليه، مصدر من الطوائف اليهودية أكد ل”كود” أن هذا ماشي شرط، وأن حتى السياح المغاربة غيمكن ليهم يزورو إسرائيل، لكن اللقاح والتحاليل إجبارية فهذ الفترة الوبائية.

وحسب مصادر “كود”، فكانت غتكون رحلة مباشرة من تل أبيب للمغرب ف29 فابريل الحالي، لكن تم فآخر لحظة إلغاءها، والحد الساعة مازال ماكاين حتى تاريخ محدد للرحلة الجاية، وهذشي ممكن يتعطل بسبب الوضعية الوبائية والإغلاق الشامل اللي فرضاتو.

وكان سبق لوزير الداخلية الإسرائيلي، أريي ديري، كشف فحسابو على “تويتر” بأنه تكلم مع نظيرو المغربي، وزير الداخلية عبد الوافي لفتيت، واتفق معاه على تشكيل فريق عمل مشترك لدراسة إمكانية جلب العمال المغاربة للعمل فإسرائيل فقطاع التمريض، وكذلك إمكانية الإعفاء من الفيزا.