كود اسماء غربي ////

ايلى تجمعو فنانين ملايرية ما كيخلصوش الضرائب وكيتخلص فيهم شي وحدين خاصة المغنيين بالكاش بحال عبد الرحيم الصويري وهاديك اللي دايرة راسها صحراوية وما عندها علاقة بالصحرا سعيدة شرف وطاهور وزايد عليهم وحدين ضعاف جدا فنيا باش يديرو شي تخربيقة اسمها “ملحمة” على مونديال 2026 عرف باللي النتيجة غادية تكون عيانة بزاف.

ولا زدتو على هاد الشي سعيد الناصري اللي داير الاخراج وكاتب الكلمات والملحن هو عبد اللطيف السعيدي غاديين تزيدو اقتناع باللي العمل عيان عيان عيان. شوهة وصافي. تخربيقة ديال التخربيق. لا كلمات لا اداء. الفنان محمد الجم كان اكثر تعبيرا باش بان بحال شي حد جابوه بزز لشي حاجة. فرضو عليه يجي ويحضر وغير كيدور فعينيه ومرة مرة كيفتح فمو باللي راه كيغني. بزاف امثال ليلى حديوي لا علاقة. علاش. سولو الناصري

دابا باش تعرفو التلفة حتى الملح عبد اللطيف السعيدي اللي الف ما سمي ب”ملحمة “ابطال” كيبين باللي هادي تخربيقة ولكن بلا ما يعيق. السيد قال ل”دوزيم: باللي هادي كان موجدها ف2010 و”باش ما ديناش كأس العالم” نساها باللي “الوطن الحبيب عاود قدم الملف لبيت النداء”. تصورو معايا مزيان باش ترشح المغرب كان بداية الالفية واكثر من عشر سنين خرج نفس الكلمات. جيل كلو تبدل. عقليات تغيرات. شباب ما عندو علاقة بهاد الشي اللي تقال.

حتى الكلمات تخربيقة وصافي. بعض المرات ما كتعرفش واش على الملك محمد السادس ولا على الوطن ولا على الرياضة. من غباءهم كيرددو “بلاد الامان يزورها الانسان برعاية الرحمان” يعني بالدارجة زورها وعول على الله يحميك. حتى فاش بغاو يتكلمو على الامن والامان خانتهم اللغة وعطات عكس ما بغاو يقولو.

بلا ما نهدرو على اللغات الاخرى وعلى حضور هاداك العدد لكبير من شي وحدين كيقولو فنانين وكيقدمو شي حاجة اخرى ماشي فن. المشكلة فهادوك يقولون ما لا يفعلون. السي الصويري كيقول باللي “عيطو علي نا فكرتش” وباللي متجندين وراء سيدنا” التجند يا السي عبد الرحيم هو تكون مواطن وباش تحقق هاد الشي خاصك تخلص بحالك بحال كاع هادوك اللي كيتخلصو كاش الضرائب. فين ساكن والطونوبيلة اللي كتحرك فيها انت ماشي مليادير بل اكثر من مليادير. اش كدير لهاد الوطن لا انت ولا امثالك. الوطن ماشي كلام بل فعل. نهار تخلص اللي خاصك تخلصو للضرائب دير انت وغيرك ملحمة غادية تكون صادقة وطبعا نسبة نجاحها غادية تكون كبيرة. اما بحال هاد الملحمة لو اعتمدوها فاختيار البلد اللي غادي يدي كأس العالم ف2026 يستحيل نحلمو بيها