عفراء علوي محمدي- كود//

اليوم الإثنين، شاركوا مجموعة من المواطنين، اللي معظمهم من ضحايا “مشروع الأعراس” الوهمي بالهرهورة، فوقفة احتجاجية قدام ابتدائية تمارة، للتضامن مع الناشطة الحقوقية ثريا شهيد، من بعدما تلقات تهديدات بعد فضحها لمافيات العقار فمنطقة الصخرات تمارة.

وإلى جانب ضحايا “مشروع الأعراس” السكني الوهمي، اللي دارتو الجمعية الإيكولوجية (إ.س)، وكلا مولاه فيه 2 مليار ونص ديال السنتيم، شاركو مجموعة من ضحايا وداديات سكنية أخرى فالوقفة، وعلى راسها ضحايا مشروع “الرمال الذهبية”، وسكان منطقة “كَش الوداية” اللي تم تفويت أراديهم بمبالغ زهيدة لشخصيات نافدة فالدولة.

وكانت أكدات ثريا شهيد، فتدوينة صفحتها الفيسبوكية، تلقيها لتهديدات مجهولة المصدر، فالتيليفون وفالميساجات فالسوشل ميديا، واكدات انها تلقات هذ التهديدات مباشرة بعد وضعها لشكايات عند الجادارمية كتتهم فيها مسؤولين وموزفين عموميين بتزوير وثائق مشاريع سكنية.

وكان قاضي التحقيق فابتدائية تمارة دخل الأربعاء اللي فات رىيس الجمعية الإيكولوجية (ه.م) للحبس، وتابعو بتهم النصب والامتيال على ازيد من 70 منخرط عندو فالجمعية، فالوقت اللي قرر يتابع شريكتو (إ.غ) فحالة سراح.