عفراء علوي محمدي- كود//

كيشوف كريم التازي، رجل الأعمال والعضو باللجنة الخاصة بالنموذج التنموي، أن الدولة منافقة فتعاملها مع الحشيش، “الأستاذة الجامعية زهرة سوكار كتقول أنها واجهات صعوبات كبيرة باش تحصل على الحشيش، بشكل رسمي، باش تدير عليه أبحاث، لكن فالمقابل إلى أي واحد بغا يشريه فكازا، فماكاين ما سهل منو”، على حد قولو.

وزاد التازي كيقول، فمداخلتو خلال ندوة من إعداد اللجنة حول تقنين استهلاك الحشيش، وشاركو فيها خبراء وباحثين وأكاديميين، “هذا نفاق كنعانيو منو، وكتعاني منو بالأخص ساكنة الريف، إذن علاش كنحطو نفوسنا فهذ الحالة ديال الضعف وعدم الاهتمام اللي خلا ساكنة كاملة كتتكون من 250 ألف مواطن تعيش فحالة غير مقبولة، وتوضع فخانة مجرمين يمكن يتعتقلو فأي دقيقة”.

وقال أن الظهيرين اللول والثاني اللي منعو استهلاك الحشيش تخاذو فالاستعمار الفرنسي.. وماكاين حتى قانون مغربي لمنع استهلاكو أو زراعتو، وفسر هذشي بكون أنه كاين ضغط من البلدان الغربية اللي عندها أهداف وأسباب مختلفة، من بينها الترويج ديال منتوجات التبغ والشراب ديالها ومحاربة الحشيش المغربي.

أشار لأن الحشيش كيتزرع هذي 70 عام فالشمال، ومايمكنش نبقاو سادين عليه عينينا، “والأحزاب السياسية خاصها تدافع على ساكنة هذ المناطق وتضمن حقوقها، وتقرح حلول لاستغلالة لأهداف تنموية، ومانجرموش الساكنة بسبب النفاق والضعف، على حساب هضرتو”.

وكلام التازي جا فالندوة اللي نظماتها اللجنة، واللي حضرو ليها باحثين وخبراء فالمجال، من أجل تدارس تقنين استهلاك الحشيش وإمكانية الاستفادة منو اقتصاديا لفائدة سكان المناطق اللي كيتزرع فيها.

وهذ الندوة كتجي بعد زيارة قامت بها اللجنة في شهر فبراير لباب برد، ولقاءها بناس كيزرعوا الكيف.