كود سبور//

صبح الدولي البرتغالي كريستيانو رونالدو أسطورة كرة القدم العالمية قريب من الانتقال للسعودي، باش يكمل فيها المسيرة ديالو وهادشي حسب ما كشفت عليه جريدة “ماركا الصبليونية هاد الصباح.

وقالت “ماركا” قبل لحظات بلي كريستيانو رونالدو قرب بسني عقد مع فريق النصر السعودي باش يكمل الكاريير ديالو فالسعودية، وأن العقد ما بين الفرقة السعودية والأسطورة البرتغالي فيه 2 مواسم ونص، مقابل 200 مليون ديال الأورو.

نفس المصدر أكد بلي هاد العرض ديال النصر السعودي ما كاينش عندو منافس فأوروبا وحتى فرقة أوروبية ما تزعم تفكر التعاقد مع كريستيانو رونالدو والفرق الأمريكية حتى هي نفس الشي، الشي اللي غادي يخلي الكابيتان ديال البرتغال يضحي بالجانب التنافسي ويلعب فدوري أقل التنافسية ويعوضو بالجانب المالي اللي غادي ياخدو مقابل أنه يلعب مع النصر السعودي.

للإشارة فكريستيانو رونالدو اللي باغي يلعب حتى يدير 40 عام، صبح دابا لعاب حر بدون فرقة من بعدما قرر فريق مانشيستر يونايتيد الننكليزي ينفصل عليه حيث وقعت ما بينهم بزاف ديال المشاكل ملي بدا هاد الموسم، وحتى الوضعية ديال اللعاب مع الفرقة كانت صعبة بزاف حيث ما كانش كيلعب بزاف ديال الوقت والمردود ديالو كان ضعيف.