عفراء علوي محمدي- كود- كازا//

كينظم معهد ثيربانطيس فكازا فهذ الأثناء المعرض البصري “كازا فالحجر الصحي”، واللي كيقدم أعمال المصور الاسباني بيدرو أوريويلا، اللي خدا تصاور لمدينة كازا خلال حالة الطوارئ الصحية اللي فرضها فيروس كورونا المستجد، وتحديدا من منتصف شهر ماي إلى منتصف شهر يونيو، واللي كتبين ميفاش المدينة كتبان خاوية بالشكل اللي عمرها كانت عليه من قبل.

وحسب بلاغ للمعهد، توصلات بيه “كود”، فمعروف على كازا أنها مدينة صاخبة وفيها بالزاف دالأنشطة وسكانها كثار، وشوارها فيهم لومبوطياج، والكلاكسونات اللي ماكيوقفوش نهائيا، والموطورات، والراجلين.. والآلاف ديال جميع أنواع وسائل النقل، وباش يتنقل الانسان فالمدينة من مكان لآخر فظل هذشي هذي مغامرة.

لكن مع الحجر الصحي هذشي كلو تبدل، كيقول بلاغ المعهد : “القواعد تبدلو فالمدينة والمراقبة ولات متشددة، والطوموبيلات دالبوليس ولاو فينما مشيتي والدنيا خوات… المدينة ولات شبح وهذشي مبهر فمدينة بحال هذي”.

والفوتوكَراف، بيدرو أورويلا اوريلانا هو مهندس اسباني عايش فالمغرب، قرا الفوتوكَرافي فجامعة سيفيل فنفس الوقت اللي قرا فيه الهندسة، وتعاون مع مجموعة من المجلات الاسبانية، الفرنسية والمغربية، بصفتو فوتوكَراف.

والمعرض موجود على الرابط التالي: https://bit.ly/31Rlk2n

كيف كاينين الصور ديالو كاملة فالصفحة الرسمية ديال المعهد على فيسبوك

https://www.facebook.com/InstitutoCervantesCasablanca/