سهام البارودي – كود//
غانرجعو لحضر التجوال ابتداءا من التسعود ديال الليل! و هادشي كان باين بالنظر لعدد الحالات لي ارتفع بزاف فالايام الاخيرة ! و طبعا مع كل قرار و كل تشديد كايبانو البكايا ! و ” خلينا ليهم الله ” و “كرفصونا ” ايه بصح انا كإنسانة كنت دايرة بروگرام ديال العطلة فهشر غشت راه بصح تكرفصت دابا بهاد الاجراءات المشددة و لكن شنو غاندير ؟
كاندفع ضريبة الانتماء لدولة فيها بزاف ديال الناس مستهترين كي القاري كي لي ماقاريش ! كي الصغير كي الكبير كاين انعدام المسؤولية! ماباغين يديرو كمامة ماباغين يغسلو يديهم ماباغين يديرو التباعد و هاكاك باغين الدولة تبقا طالقة ليهم اللعب ! مايمكنش !
راه كايقول المثل شوية من الحنة و شوية من رطوبية اليدين !هادشي لي كانعيشوه اليوم هوا الضريبة ديال الاستهتار الجماعي لي كانشوفوه فالزناقي و القهاوي و السواقات فين بنادم متبقاش گاع عاقل على شي حاجة سميتها كورونا ! صافي غي قالت ليهم الدولة غانخففوا الاجراءات هوما يتطلقو ! فحالا صافي قطعنا الواد و نشفو رجلينا !
راه مصيبة هادي ! ماكايناش شي حاجة سميتها المسؤولية الفردية عند عباد الله ! بنادم كاتقوليه دير الكمامة هوا شاد الضد ! شاد الضد مع راسو ! ماباغيش يديرها ! دير التباعد ! لا ماغايديروش ! شاد الضد ! الناس شادين الضد مع راسهم ! اجراءات بسيطة ماقادرينش يطبقوها و كايعرفو غي يغوتو حيت الدولة قررات تسد !
هادي هي حكلي زكي و لا نبكي !
