كود سعيد الشاوي ///

هاد السيمانا غادي ماشي يتحسم فالتحالف الحكومي للي بان السيمانا اللي فاتت٬ بل فالهيكلة الحكومية وتوزيع الحقائب. يعني غادية تكون هاد الحكومة اللي كيرأسها عزيز اخنوش رئيس التجمع الوطني للاحرار٬ بدات خدمتها بعد تعيينها من قبل رئيس الدولة.

دابا تبدا الهدرة على الاستوزار. شكون باقي وشكون غادي. المنطق كيقتضي ان وزراء التجمع الوطني للاحرار اللي من حقهم يبقاو حقاش الحزب ربح الانتخابات. الباقي خاصو كولو يتغير.

كاين وزراء السيادة كيحكم فيهم لقصر وكاين وزراء يعينهم رئيس الحكومة. هنا كاين توافق بين القصر والاحزاب. غير هو ايلى بصاح خاص تغيير٬ خاص لقصر يلعبها مزيان.

اليوم كاين امل. كاينة انتظارات كثيرة فحكومة اخنوش. كينسناو واش غادية طبق برنامجها الانتخابي ولا للا. عطات وعود بالارقام. هاد الامل خاصو حكومة جديدة.

عليه خاص وزير خارجية جديد فبلاصة هاداك الديبلوماسي المراهق ناصر بوريطة. ما يمكنش نبداو صفحة جديدة مع اسبانيا وهي بدلات وزيرة خارجيتها وحنا اللا. لا لاحظو انو بعد خطاب الملك على عودة العلاقات مع الصبليون٬ ما وقع والو. ما رجع لا سفيرة ما تفتحاتش الحدود البحرية. اي هاد الشي خاصو يجي مع وزير جديد ماشي مع وزير باغي غير يضارب.

وزير اخر خاصو يغبر وجهو هو وزير الصحة خالد ايت الطالب. الاحرار عطاو وعود كثيرة فقطاع الصحة. خاصهم ياخدو هاد القطاع والا كيتنفلاو على لمغاربة. خاصهم يطبقو برنامجهم كيف قالو.

طبعا عودنا رئيس الدولة ان وزير الداخلية ما عمرو فات 5 سنين من نهار وصل محمد السادس للحكم. ما باغيش يعاود تجربة ادريس البصري. الوزير يدوز ايامو ويمشي فحالو.

وزير الاوقاف والشؤون الاسلامية هادي هي لوجيبة يجي واحد جديد. وزير جديد بدم جديد. ايلى بصاح باغيين تعطيو دماء جديدة ماشي غير للحكومة بل لكافة قطاعات الدولة.

طبعا كاينين وزراء خاصهم يتغيرو سنوات وهما فبلاصتهم.

المغرب عندو كفاءات. خاصو طاقات جديدة. خاص وزراء قافزين. المسؤولية ماشي غير ديال الاحزاب بل حتى ديال القصر. خاصو يجيب الجديد. ايلى خلي كمامر بحال بوريطة وايت الطالب عرفو هاد الشي غادي غير يحبط اكثر من شخص فهاد لبلاد.