عفراء علوي محمدي- كود//

الكازاويين اليوما خرجو فرحانين بأول نهار لتخفيف الحجر الصحي، ساحة ماريشال عامرة بالناس على عكس الأيام اللي فاتت، الناس مقهويين وكَلسين فالريسطورات، والحياة رجعات لكازا من جديد.

“كود” سولات مجموعة منهم على أول الأمور اللي كيفكرو يديروها من بعد ما دوزو ثلث شهور ديال الحجر الصحي فديورهم، بزاف منهم بغاو يمشيو للحلاق، كاين اللي فرحان باش يرجع يمشي للحمام، وكاين اللي عاجباه الكَلسة فالقهوة والريسطورةن من بعد كَاع هذ الوقت اللي تحرم فيه من هذشي.

سعد (32 عام) قال ل”كود” : “هذ القهوة ديال كافي فرونس ماكاينش بحالها، بصراحة توحشت نكَلس فهذ البلاصة نيت اللي كَالس فيها دابا وناخد نورمال، فهذ الحجر توحشنا بزاف ديال الحوايج اللي تحرمنا منها، ودابا صافي تجاوزنا هذشي ومن حقنا نفرحو، بحال إلى تولدنا من جديد”.

سهام (19 عام) حتى هي عبرات على الفرحة ديالها بهذ تخفيف الحجر، كتقول بللي اليوم غادي تخرج تلاقى صحابها، و هذ الأيام كتوجد باش تدوز لونتروتيانات دالخدمة “خاصني مازال نمشي للكوافورا ندير سوان دفيزاج، نوجد راسي باش ندفع لاخدمة، حيت فهذ الحجر الصحي مادرت والو صراحة، ودابا خارجة نتقهوى مع صحابي ونبدل الجو شوية”.

“كود” سولات ناس خرين حتى هوما على الشعور ديالهم بالخروج هذ النهار، عادل كيقول: “ضروري اليوم نمشي للحلاق نحسن، ودابا خارج مع الوليدات يفوجو شوية، والدنيا مزيانة والقهاوي معامرينش بزاف وحتى الطرونسبور، وكنتمناو الفيروس ينشي دغيا”.

شخص آخر جا من المحمدية باش يدور شوية فكازا : “اليوم بحال العيد، واخيرا طلقونا باش نخرجو، وضروري نفوجو ونحيدو الروتين والقنط ديال الحجر، وقريب نمشيو انا الوليدات للبحر نديو باراسولاتنا ونبردو هوايشنا”.