سهام البارودي – كود//
عندي صديقة سميتها سلمى المصمودي كانعتابرها من أحسن الأمهات لي شفت فحياتي ، سلمى دايرة گروب فالفايسبوك كايناقش طرق تربية الاطفال و كاتحط فيه شي مواقف كايطراو ليها مع بنتها لي يقدرو يبانو لينا عاديين و لكن هي كاتخلق منهم فرصة للتعلم و كاتقاسم مع الامهات حتى بعض ليزاكتيفيتي لي يقدرو يديروهم مع وليداتهم باش ينميو فيهم حس الابداع و حب الاكتشاف
قراو معايا هاد المنشور ديالها باش تعرفو السيدة فين وصلات فالتربية!
“هادي واحد المدة تنشوف بنتي فين ما تاكل الفاكهة كتبدا تجمع الزريعة او النواة ديالها. فالاول كيحسابني واش كتزرعهم فالحبوقة ديال السطيحة. اليوم حضيتها و انا نلقاها كتخليهم فواحد المجر فبيتها!!!!
ردة الفعل العادية هي تقوليها لاش تتجمعي هاد الزبل و غدي تجمعي علينا الحشرات إلخ.
واش فنضركم غندير هاد ردة الفعل ؟ ههههههه بطبيعة الحال لا
جبدنا داك الكنز و قلت ليها ان هادشي لي دارتها عمل علمي كبير كيتسمى بنك البدور و لي كاين فالمعهد العالي للزراعة و البيطرة فالرباط او INRA ففرانسا
و لكن خاصها تنضموا تفرق البدور و كل نوع ديرو فميكة و نكتبوا سمية ديال البذرة و العام
وهكذا دوزنا الصباحية الكئيبة ديال نهار الاحد فالحجر الصحي
ونتم كيفاش دوزتوا صباحكم؟”
شفتي آ بعرور ؟ واش قريتي آ بعرورة ؟ شفتي النيفو لي وصلو ليه الأمهات فالتربية ؟ عيقات ياك ؟ زادت فيه ؟ غي كاتكذب باينة ! وايلي لقات بنتها كاتجمع الزريعة و عوض تلوحها ليها فالزبل و ضربها ليها بنتفة و لا قرصة بين جذور الفخاض ” هااااااا لي يجمع علينا الزبل ” ” هاااا لي كايجمع الوسخ و غايجيب لينا الناموس ياكلنا” و لا ماضربهاش غي تخاصم عليها بطريقة راقية “ماتعاوديش آ الحمارة تجمعي الزبل ! يا وجه الزبل ! يا تريكة الزبل ! فحالك فحال عماتك سبحان الله كاتموتو على الزبل ” لا سلمى جلسات كاتهضر لبنتها على بنك البذور و انواع البذور و حاولات تخلق من هاد التجربة فرصة للبنت لحب الاكتشاف و الابداع!