كود – وكالات//
تقتل السفير الإيطالي بجمهورية الكونكَو الديمقراطية، لوكا أتنازيو، اليوم الاثنين فالصباح، إثر هجوم مسلح بالقرطاس تعرض ليه الموكب ديالو، وتغتال فيه هو وجوج من اتباعو، واحد مرافق ليه والثاني من الشرطة العسكرية.
وحسب بيان لوزارة الخارجية الطليانية، السفير تعرض الاغتيال خلال مشاركتو فنشاط دبرنامج الأغذية العالمية برعاية الأمم المتحدة، وداز الموكب ديالو قريب لمنطقة كَوما.
ومرات السفير المغربية، زكية الصديقي، اللي كترأس جمعية مختصة فالعمل الإنساني، منعات من هذ الاغتيال، بحيث مارفقاتش راجلها هذ المرة، واخا مولفة كتخرج معاه فمجموعة من الأنشطة اللي كيدير.
وعلنات جمهورية الكونكَو على فتح تحقيق فهذ الهجوم، بحيث بدا الجيش كيدير حملة باش يقلب على ليزانديس اللي غيوصلوه لمنفذي هذ الاغتيال، اللي لحد الساعة مامعروفينش، بحيث هربو فالبلاصة فاش نفذو الخطة ديالهم.
وكان قال السفير مؤخرا للصحافة أن حياتو هو ومراتو ووليداتو بثلاثة مهددة.
وكان لوكا أتنازيو كيشغل منصب القنصل الوصي فالقنصلية الإيطالية فكازا، وتماك فاش تعرف على مراتو زكية اللي عندو معها 3 ديال البنات.