نقابة الصحافة زادت دروس أخرى على دروس “الهاكا” فقضية فبركة جريمة شفرة على المباشر.. كنبهو للانزلاقات الكثيرة لي كتوقع فعمل بعض الإذاعات الخاصة ويجب إعادة النظر فالقانون المنظم للقطاع السمعي البصري
وكالات //
مراهق بريطاني شاف الموت بعينيه بعدما شم كَاز “L’oxyde nitreux / Le protoxyde d’azote”، اللي معروف ب”كَاز الضحك”، فاش كان ففيستيفال “باركلايف” الموسيقي فمانشيستر.
جورنال “ديلي ميل” البريطاني قال أن أليكس ليتلر (Alex Littler)، فعمرو 16 عام، مابقاش قادر يتنفس وتنفخ ليه عنقو وحالتو ولات خايبة، بسباب الموجة ديال الضحك الهستيري اللي دخل فيها بعدما شم الكَاز المذكور.
البعلوك مللي صحتو تأزمات وتزير هو يعتارف لمو والطبيب بللي شم “أكسيد النتروس” اللي كيتسبب فالدخول فحالات ضحك لاإرادي وغير متحكم فيها، وخا أعراض و تأثير الشمة/التبويقة يقدر يجي ويمشي بالخف ولكن عندها مخاطر كبيرة بزاف، وهادشي اللي وقع لأليكس وتسبب ليه فتمزق وسط الرية ديالو، وعندو الزهر بقا صامد قبل مايهزوه يتعالج، أما كان ممكن يموت فالبلاصة، كيف قالو أطباء.
“أكسيد النتروس” كيتباع بشكل قانوني فبريطانيا بحال بزاف ديال البلدان، لأنه كيخدمو بيه فمجال التخدير وغيرو من تخصصات طبية أخرى، لكن فالمقابل أيضا منتاشر الاستعمال ديالو بشكل غير قانوني، مثلا للتبواق وللدخول فحالة من الضحك الهستيري.