الرئيسية > آراء > كانحتارم العيالات فحال الحمداوية ونوال السعداوي حيت كانشوف بلي ف2021 وصعيب بزاف انك تعيشي كمرا فالمغرب ولا مصر ولا شي دولة من دول العالم الماوراء شمسي فمابالك بهاد العيالات لي ختارو بكل شجاعة انهم يواجهو القيم البوزبالية ويفرضوا الوجود ديالهم يامات كانو البوليس بالنبل والبامبية بالسطولة..
06/04/2021 13:00 آراء

كانحتارم العيالات فحال الحمداوية ونوال السعداوي حيت كانشوف بلي ف2021 وصعيب بزاف انك تعيشي كمرا فالمغرب ولا مصر ولا شي دولة من دول العالم الماوراء شمسي فمابالك بهاد العيالات لي ختارو بكل شجاعة انهم يواجهو القيم البوزبالية ويفرضوا الوجود ديالهم يامات كانو البوليس بالنبل والبامبية بالسطولة..

كانحتارم العيالات فحال الحمداوية ونوال السعداوي حيت كانشوف بلي ف2021 وصعيب بزاف انك تعيشي كمرا فالمغرب ولا مصر ولا شي دولة من دول العالم الماوراء شمسي فمابالك بهاد العيالات لي ختارو بكل شجاعة انهم يواجهو القيم البوزبالية ويفرضوا الوجود ديالهم يامات كانو البوليس بالنبل والبامبية بالسطولة..

سهام البارودي – كود//

واخا انا شخصيا ماشي فان ديال الحاجة الحمداوية و ماقريتش الكتوبة ديال نوال السعداوي و لكن الموت ديال هاد جوج ديال الايقونات فهاد الفترة المتقاربة كان عندو معنى كبير بالنسبة ليا.

تخايل معايا آ ولد عمي بلي اليوم فالفين وواحد و عشرين عصر التيكنولوجيا و العلم و الحقوق ديال المرأة ( نسبيا) و المدونة و هاكاك مازال صعيب بزاف انك تكوني مرا فالمغرب و الدول لي كايشبهو ليها من ناحية القيم المجتمعية ! صعيب اليوم على بزاف ديال العيالات انهم يعيشو كي بغاو ! انهم يقراو ! انهم يخدموا ! انهم تكون عندهم حياة جنسية سوية ! يختارو معامن يتزوجو ! مازال لدابا بزاف ديال الاحياء وسط كازا الهراويين مثلا ماتقدرش المرا تخرج فيه بصاية و لا شورط و لا غي لابسة زوين شوية حيت غايطيرو بيها ليزانديان و غاتشبك تخوار  تعباز و تحرش و قوادة ! اليوم وسط هاد التقدم الحقوقي الكبير مازال كانحس كمرأة انه الوجود ديالي فالفضاء العام كايديرونجي بزاف ديال الرجال و حتى العيالات ! و مازال تقدري تعيشي الميز بسبب الجنس ديالك فالادارات و الخدمة …

ايوا لاكانت هاد القوادة كانعيشوها دابا فالفين وواحد و عشرين ! كيفاش غاتكون حالة المرأة فالعهد ديال الحاجة الحمداوية فالمغرب و نوال السعداوي فمصر ! الوقت لي خرجات فيه نوال السعداوي تقرا الطب و الوقت لي كانت كاتتحارب مع الخوانجية و الهيماج و التتار الذكوري كانت السيدة بوحدها فاص ا فاص مع جيوش ديال بوزبال كاتواجهم بشجاعة ! فالوقت لي كانت نوال السعداوي كاتتقاتل ضد التيار الظلامي كانو اغلب العيالات مكمشين فالديور تحت السباط ساكتين و نفس الشيء بالنسبة للحاجة الحمداوية ! واش كاتخايل شحال كان صعيب شحال هادي باش المرا تنوض تغني ؟! وسط المغرب ديال الخمسينات و الستينات و السبعينات ! و الله و ماكانت لالة و مولاتي لا زططات راسها ! نجاة عتابو مثلا كاتعاود بلي خوها كان كايقلب عليها باغي يذبحها الشيء لي خلاها تهرب و تكمل المسيرة ديالها الغنائية … و هادي نجاة عتابو لي اصغر  سنا من الحمداوية فما بالك بالحمداوية لي عاشت ففترة ماكانت فيها لا حقوق النساء لا حرية شخصية لا والو !

شحال من واحد كان غايبغي بنتو و لا ختو تكون شيخة فالخمسينات و الستينات ؟! طبعا ماغاديش تلقا ديك الوقت شي حد لي يهز صبعو و يقوليك انا ! و هاكاك كانت عندنا الحاجة الحمداوية ! و فاطنة بنت الحسين و الشيخات ديالنا القدامات لي كان عندهم ما يكفي من الشجاعة باش يواجهو ليزاباش ديال المجتمع و القيود المفروضة و دوك الافكار الهمجية البدائية و يغنيو و يبدعوا و يخليو لينا رصيد ديال الاغاني الجميلة نتفكروهم بيه !

راه لي خاصنا نفهمو هوا انه هاد الشجاعة لي كانت عند الحمداوية و السعداوي و بنت الحسين راه شي حاجة استثنائية للاسف ! ماشي گاع العيالات عندهم الأواني النحاسية باش يگولو للسبع فمك خانز ! سبع المجتمع و سبع دوك التقاليد البوزبالية و سبع الظلامية و شلا سبوعا كايضاربو معاهم العيالات كل نهار باش يفرضو الوجود ديالهم ! الشجاعة ديال الحمداوية و السعداوي استثنائية و غي على هاد الشجاعة هادي راه بالنسبة ليا كايستاحقو احترام كبير كبير كبير بزاف !

و شكرا ليهم ! شكرا لنوال السعداوي و للحمداوية و لكل امرا حرة وقفات و دارت داكشي لي بغات ضد فجيوش الهيماج! عاشت و غنات و نشرات قيم الحضارة و الجمال و الفن و المساواة ! حيت بفضلهم بزاف ديال العيالات اليوم كاينعمو بحقوقهم واخا غي شي شوية !

الله يعز العيالات الفحلات! لالياتي ! و الله ينعل الطاسيلة للفجلات الخراجات الساكتات المغبونات الخاضعات المستسلمات لي بسبابهم كانخسرو سنوات فمعركة حقوق المرأة!

موضوعات أخرى

29/03/2024 00:00

نقابة الصحافة زادت دروس أخرى على دروس “الهاكا” فقضية فبركة جريمة شفرة على المباشر.. كنبهو للانزلاقات الكثيرة لي كتوقع فعمل بعض الإذاعات الخاصة ويجب إعادة النظر فالقانون المنظم للقطاع السمعي البصري

28/03/2024 23:30

جثة مجهولة كلاوها الكلاب فالطريق بين العيون وفم الواد دارت استنفار فالجوندارم