سهام البارودي – كود//

فئة كبيرة ديال المغاربة مربية على انها ماتحملش مسؤولية قراراتها فالحياة ! كايقوليك مشا عليا الطوبيس ! عكلاتني واحد الدرجة ! فات عليا الوقت ! عوض انه يقوليك انا تعطلت على الطوبيس حيت انا فوت الوقت و انا تعكلت مع الدرجة ! و طبعا هاد عدم تحمل المسؤولية كيما كاين فالحويجات الصغار فحال هادو كاين حتى فالحوايج الكبار و القرارات المصيرية فالحياة !
كاتلقا بوگرن لامادار والو فحياتو و سولتيه علاش مادرتي تاقنوة ؟ غايقوليك الواليدين ماقراوناش ! الوقت ماعطاتناش ! البلاد كاتعطي للبراني ! بنادم تابعك ! ساحرين ليا ! بلا بلا بلا و مجموعة من الهضور العوجة لي الهدف ديالها واحد هوا انه الانسان المغربي ( واحد الفئة كبيرة ) كاتبغي تتملص من المسؤولية ديالها !

و كايبقاو الفنانة ( بعضهم ماشي كلهم و خصوصا فالجيل القديم ) هوما لي كايتربعو على عرش ثقافة ” عدم الاعتراف بالمسؤولية” شحال من فنان كانشوفوه كايظل يبكي و يشكي ( صفية الزياني مثلا) ! لاواه ماعندي ماناكل لاواه جرا عليا مول الكرا لاواه مريض ! و حنا مالنا ؟ و أنا مالي آ سي الفنان ؟ نتا ختاريتي انك تخدم فنان وانا مالي ؟ نتا ختاريتي انك ماتقراش باش تكون طبيب و لا مهندس ! ختاريتي ماتخدمش فوظيفة و لا شركة! ختاريتي ماتفيقش الصباح و تشعبط فالطوبيسات فحال عباد الله و توقف فبيبان المعامل ! نتا ختاريتي تفيق فوقما بغيتي و تنعس فوقما بغيتي و مايكونش عندك باطرون و مادوزش امتحانات وظيفية ! نتا اختاريتي حياة الفن ! ختاريتي حياة الركح ! ختاريتي ماتكوتيزيش فلاسينيسيس و ماتساهمش فشي اصورانص ! علاش فاش كاتمرض و لا كاتشرف و لا كاضرب باباك الحزقة كاتجي تبكي علينا ؟ و تبغي الدولة تتعامل معاك بشكل مختلف على گاع المغاربة لي ضاربة باباهم الحزقة و تعطيك شي گريمة و لا شي دعم و لا ايتها بزولة ترضع منها الريع ؟ علاش ؟ واش غي حيت كنتي كاتبان فالتلفزة يصحاب راسك عندك الحق دير لي بغيتي ؟ طبعا لا كلنا سواسية حتى فالحزقة ! سواسية !

آش هاد الثقافة الخروانية لي عند بعض الفنانة ديالها ! ثقافة الريع و الاستغلال و عدم تحمل المسؤولية!

فقصة عائلة ميگري انا شخصيا كانتضامن مع مولات ديك الدار لي مابغاتش عائلة ميگري تخرج منها ! كانتضامن معاها حيت اولا القانون فصفها و ثانيا الدار ديالها و ثالتا حيت هي مجهولة و عائلة ميگري معاها عرام ديال الميكروفونات كاتسولهم شنو بغيتو ؟ و شنو خاصكم ؟ كانتضامن معاها حيت من حقها يخويو ليها دارها و يخليوها دير فيها لي بغات !

واحد من العائلة د ميگري و هوا كايهضر على الافراغ لي جاهم قال : حنا فلوسنا ماكانشريوش بيهم الديور كانشريو بيهم التذاكر ديال الطيارة و الآلات الموسيقية !

ايوا آ سي ميگري نتا درتي اختيار فحياتك انك ماتشريش الدار ! نتا قررتي مع راسك انك تخسر فلوسك فالطيارات و فالدرابك و الگيطارات و البنادر ! و حنا مالنا ؟ و مولات الدار لي شرات داك الدار بفلوسها مالها ؟ علاش ولات هي مسؤولة على الاختيارات ديالك العوجة ؟!

كون شريتي دارك كوراك ساكن فيها تاواحد ماغادي يخرجك منها ! و باش يساليو هضرتهم قاليك كانطالبو من سيدنا يتدخل ! واش غي لي دار شي مصيبة ! غي لي حملات و هرب عليها الزلال ! غي لي ماخلص الكرا و دعاه مول الدار ! غي لي محكوم عليه بالافراغ يعيط لسيدنا يعتقو بلا حشمة بلا حيا؟! ياك القانون حكم لصالح السيدة ايوا خرجو ليها من دارها بلا قوة البكا و التمسكين !

الدار الناس كايخدمو باش يديروها ! بزاف ديال المغاربة كايغرقو كريديات ! كايجوعو راسهم وولادهم ! كايجمعو الريال على خوه باش يديرو الدار ياجورة بياجورة باش نتوما احسن منهم ؟ باغين تسكنو فدار السيدة بزز منها ؟ زوينة هادي !

شي حد يقول لهاد الفنانة خصوصا شي وحدين الجينيراسيون القديمة بلي طلعو لينا فكر كر كرنا بقوة السعاية و الريع و عدم تحمل المسؤولية لي كايعيشو فيها ! فاش كاتكون الفلوس دايرة و الحبة كاينة كاتكونو ضاربين الطم و مكونين ! غي كاطبو رزقكم و تجيو تبكيو علينا !