كود احمد الطيب ///

وزير الداخلية عبد الوافي لفتيت قال اثناء تقديمه لقوانين صادق عليها البرلمان بخصوص الحجر الصحي هاد السيمانا ردا على سؤال لعبد اللطيف وهبي زعيم البام والبرلماني “كاينين ناس كتقوليهم دخل فحالك ودخل فحالك ومكيبغيش يدخل” وزاد :”حالة بحال هادي كاينين انزلاقات والله يحسن العوان السلطات لي كيظلو واقفين نهار كامل”.

البرلماني سولو على تصرفات ضد حقوق الانسان داروها شي وحدين محسوبين علي الداخلية. مازال ديك الساعة ما خرجش الفيديو اللي فيه رجل سلطة قايد او باشا لابس الكسوة رفقة البوليس وهو كيصرفق اللي لقاه خارج بلا سبب ويقول ليه دخل لدارك.

ما ضربش غير واحد. ضرب اكثر من واحد. كيسولهم على علاش خارجين وكيشوف لاكارط ناسيونال وكيصرفق ولا كيبيوط الشباب. خرج القانون ومارس العنف غير المبرر لرجل سلطة. هو معاه الامن والقوات المساعدة مع واحد او اكثر واللي ما دار حتى مقاومة. تصرف كيفكرنا بايام القمع زمن الحسن الثاني. قياد ادريس البصري هاد القايد. ايلى خرق القانون عندك القانون طبقو ولا قيدو اسمو وعطيوه انذار ومن بعد قدمو للقضاء. شكون انت حتى ضربو

دابا مضاربة جوجت العقليات ديال القياد. قياد محمد السادس واحترام حقوق الانسان كيدخلو فاطار القانون كيديرو التوعية بحال كيف القايدة حورية وقياد خراين٫ وبين قياد زمن الحسن الثاني هادو لغتهم هي الضرب والعنف.

هاد التصرفات المهينة لحقوق الانسان شوهات صورة القايدة حورية وغيرها. تصرفات ما كانتش محتاجاها وزارة الداخلية اللي كدير خدمة مزيانة فهاد الحالة الاستثنائية. غير الوزارة عارفة باللي استثناءات بحال هادي كتحرك مواجع الماضي اللي ماشي بعيد. ماضي كان القايد يصول ويجول. يضرب وينطح. قياد البصري زمن الحسن الثاني.  العنف طبعا ما جابوش من بلاد اخرى. اللي كيشوف تعليقات ناس فوسائل التواصل الاجتماعي كيطلبو ممارسة العنف ضد كل مخالف يفهم باللي هاد الثقافة البصرية مازال معششة فعقول نسبة من المغاربة. هادو بداو كينشرو فيديوات الحسن الثاني باغيين انتهاك حقوق الانسان كيف مارسها البصري. عاجبهم الحال هاد المتخلفين

دابا قياد محمد السادس خرج ليهم قائد الحسن الثاني من الجنب. دابا كاين واحد اللي كاين فيديو كيبين باللي مارس العنف غير المبرر المجاني. نتمناو يبقى حالة استثنائية