جثة مجهولة كلاوها الكلاب فالطريق بين العيون وفم الواد دارت استنفار فالجوندارم
كود هناء ابو علي ///
سعد لمجرد قودها بزاف. اكفس حاجة وقعات ليه فقضيتو بعد اتهام فرنسية اسمها لورا بريول ليه باغتصابها ف2016 ففندق باريسي. محكمة الاستئناف قررات اول امس الثلاث 02 مارس 2021 ترسل قضيتو للجنايات. محاميه كلهم كانو كيطلبو ويتمناو تبقى القضية جنحة وما تمشيش جنايات. وحسب المحكمة فهاد القرار جا بسباب تضارب تصريحات سعد لمجرد فيما كانت تصريحات لورا منسجمة. لمجرد كان قال فاللول باللي تباوس مع البنت وعاونا تحيد حوايجها. من بعد قال فتصريح اخر للقاضي باللي دفعاتو وقمشاتو فعنقو وضربها لوجها. دار تصريحات اخرى متناقضة. اما الضحية فكانت تصريحاتها اللي قالتها فاللول هي نفس التصريحات. ما غيرات والو.
دابا اش كيعني هاد الجنايات. يعني ان لمجرد غادية تحكم عليه هيئة قضائية فيها ناس من المجتمع المدني كدار قرعة لاختيارهم. مع قضايا الاغتضاب وهاد “مي تو” حظو قليل باش يخرج منها.
فالجنحي كان يقدر يتحكم بما قضى او بمدة قصيرة. دابا ممكن يتحكم عليه ايلى تمت ادانتو وغالبا هاد الشي اللي غادي يوقع٬ باكثر من عشرين عام