الرئيسية > آش واقع > قطعو الماكلة احتجاجا على 3 قرون دالحبس والزفزافي كان معول يجوع حتى للموت فالكاشو.. هذي كرونولوجيا إضرابات معتقلي حراك الريف على الماكلة من نهار تشدو لدابا بالأسباب والحيثيات – الجزء الثاني
10/09/2020 17:00 آش واقع

قطعو الماكلة احتجاجا على 3 قرون دالحبس والزفزافي كان معول يجوع حتى للموت فالكاشو.. هذي كرونولوجيا إضرابات معتقلي حراك الريف على الماكلة من نهار تشدو لدابا بالأسباب والحيثيات – الجزء الثاني

قطعو الماكلة احتجاجا على 3 قرون دالحبس والزفزافي كان معول يجوع حتى للموت فالكاشو.. هذي كرونولوجيا إضرابات معتقلي حراك الريف على الماكلة من نهار تشدو لدابا بالأسباب والحيثيات – الجزء الثاني

عفراء علوي محمدي- كود//

مازال مستمرين مع قراء “كود” فكورونولجيا الإضرابات على الماكلة اللي داروها معتقلي حراك الريف من نهار تشدو لدابا. 

فهذ الجزء غنسردو أبرز الإضرابات اللي كانت فسنة 2018 اللي عرفات صدور الحكم الابتدائي فحق المعتقلين، كيف تعاقبو فيها بزاف وكاين فيهم اللي دخل للكاشو بحال الزفزافي، كيف كاين اللي بسباب الإضراب جابها فصحتو.

نبداو بنهاية سنة 2017، فداك الوقت كانت النيابة العامة دارت لقاء مع مجموعة ناصر الزفزافي، اللي مضربة على الطعام من 26 دجنبر، ومنهم خصوصا نبيل أحمجيق، باش تسولهم على أسباب إضرابهم، وهكذا أكدو ليها بأنهم حابسين الماكلة بسبب سوء التعامل معاهم فالمؤسسة السجنية، فواعداتهم بالحل، وقنعات 33 واحد بتعليق الإضراب، أما الزفزافي و4 خرين فبقاو مستمرين فالإضراب ديالهم، واستقبلو سنة 2018 بيه.

ف4 يناير 2018، جمعيات حقوقية والمحامين ديال المعتقلين فالملف خرجات كتحذر و وتقول أن الزفزافي فوضعية صحية صعبة بسبب الإضراب، وأنه خسر 10 كيلو من الوزن ديالو، وهذشي خلا إدارة السجن تجتمع بيه فالحال لا هو ولا صحابو المضربين، وتقنعهم بالتالي بتعليق إضراب مقابل انها تولي تعاملهم مزيان.

ف14 مارس، خرج أحمجيق يعلن عاوتاني إضرابو على الماكلة، بسبب “منع عائلتو من زيارتو” كيف قال المحاميه، وتبعوه معتقلين خرين، وف5 أبريل هدد الزفزافي بإضراب جديد على الطعام بسبب “تلقيه الإهانات فالسجن”، لكن ماداروش.

الجوع فرمضان والفطور بكاس دالما

ف24 ماي، وفشهر رمضان، الزفزافي قطع الماكلة مع رفع شعار “اللاعودة”، وهكذا، وفنفس النهار، حتى عائلة المعتقلين تضامنات معها ودخلات فإضراب عن الطعام، وفطرات داك النهار بكيسان ديال الما، وتبعوهم المعتقلين لخرين اللي حبسو الماكلة ف26 فنفس الشهر، وهوما : “محمد الحاكي، محمد المجاوي، نبيل احمجيق، اشرف اليخلوفي، عبد العالي حود، جمال مونا، جواد بنعلي، زكرياء ادهشور، جواد بنزيان، عمر بوحراس، واحمد حاكمي”، كيف قالت المحاميةبشرى الرويس فتدوينة ليها.

ف29 ماي، فإحدى محاكمات المعتقلين، عبر ممثل النيابة العامة على رغبتو فالتحاور مع المعتقلين، وزيارتهم مع الدفاع ديالهم للزنازن ديالهم فعكاشة، باش يعرف السبب اللي خلاهم يديرو إضراب عن الطعام، كيف طلب منهم باش يوقفوه.

ف31 ماي، ومن بعد 5 أيام، عائلات المعتقلين حبسات إضرابها عن الماكلة، بطلب من الزفزافي اللي تكلم مع باه فالتيليفون، ومن بعد تبعهم حتى هو ف2 يونيو، بحيث كمل 12 ليوم دالجوع وتراجع على شعار “اللاعودة” استجابة لنداء المسؤولين بعد مفاوضات مع إدارة “عكاشة”، وتبعوه معتقلين خرين كانو مضربين، باستثناء ربيع الأبلق وعبد العالي حود.

إضراب بعد 3 قرون دالحبس

ومن بعد صدور الحكم الابتدائي عليهم ف26 يونيو، معتقلي حراك الريف ماتقبلوش تتوزع 3 دالقرون عليهم، خداو منها الزفزافي وأحمجيق حصة الاسد (20 عام لكل واحد فيهم)، وقررو يستأنفو إضرابهم على الطعام تاني ف28 يونيو، وقبل حتى ما يستأنفو الأحكام.

وفهذ الفترة كاملة كان بقى الأبلق مضرب على الطعام، حتى تدهورات حالتو، وواخا خرجو العائلات يرغبوه، وحتى الزفزافي معاهم، ماقدروش يقنعوه، وبقى حابس الماكلة حتى هزو للسبيطار فاليوم 35 ديال إضرابو عن الطعام.

وف9 يوليوز، إدارة عكاشة خرجات ببلاغ كتقول أن المعتقلين حبسو الإضراب ديالهم، بلا ما يحددو السبب، وجميعهم قررو يستأنفو الأحكام الصادرة فحقهم، باستئناف ربيع الأبلق، اللي محكوم عليه ب5 سنوات، واللي كان داك الساعة داير إضراب على الطعام والزفزافي حاول يقنعو باش يعلقو عن طريق محامين، حتى قرر يحبس أخيرا.

الزفزافي حابس الماكلة “حتى الاستشهاد”

ف30 غشت، الزفزافي كعا ديال بصح، ورجع عاوتاني يدير إضراب على الطعام والما والسكار “حتى الاستشهاد”، ووصى الوالدة ديالو باش إلى مات تديه يتدفن فالريف، ومن بعدو رجع الأبلق حتى هو يدير إضراب لغدليه، وفديك لوقيتة خرجات إدارة السجون كتوضح وتقول أن هذ الإضرابات جات بسبب ترحيل أشرف اليخلوفي لسجن “تيفلت” من أجل تأديبو، هذ الاخير اللي حتى هو قرر يبدا الإضراب ديالو على الطعام، كيطالب مو خلالو بالرجوع لكازا.

ف4 شتنبر، قررات إدارة السجون ترجع الزفزافي للزنزانة الانفرادية، عقابا ليه على استمرارو فالإضراب على الماكلة، وهذشي غير قبل نهار من تجميعو هو وصحابو فجناح واحد ف”عكاشة” لأول مرة منهار تعتقلو.

ف6 شتنبر، قررو جميع المعتقلين يحبسو الإضراب، ومنهم حتى اليخلوفي اللي رجعوه لكازا، والزفزافي حتى هو حبس الإضراب من بعد ما خرجوه من الكاشو، واخا كان قبل باغي مايسالي الإضراب حتى يموت ويتدفن فالريف.

جمعية: نقذو حياة المعتقلين المضربين على الماكلة ! 

ف24 أكتوبر، وحسب شقيق المعتقل ربيع الأبلق، رجعو المعتقلين يخططو لإضراب جديد على الطعام، وأبرزهم الزفزافي، وأحمجيق، محمد المجاوي،  والحاكي، والأبلق، وبلال أهباض، لكن سرعان ما تراجعو عليه، كيف قال إدارة سجن “عكاشة”.

لكن فالمقابل مازال كاين معتقلين دايرين إضرابات على الطعام، ولكن ما عالمين بيها حد، بحيث ف14 نونبر خرجات جمعية “ثافرا” للوفاء والتضامن عند عائلات معتقلي الحراك، كتطالبه باش يتدخلو لإنقاذ حياة وسيم البوستاتي، وربيع الأبلق، ورضوان أفاسي، بسبب المخاطر اللي كتهددهم بعد دخولهم فإضرابات على الطعام.

موضوعات أخرى

19/03/2024 05:00

جورنال “الدايلي مايل ” بغا يحبس الشائعات لي كتسركل على الأميرة كيت: شهود شافوها كتدور مع راجلها وولادها

19/03/2024 03:00

مرض نادر كينتاشر فالجابون بطريقة كتخلع.. والعلماء مقدروش يعرفو الأسباب ديالو

19/03/2024 00:00

رابطة البوليساريو فالصبليون كضغط على وزارة الثقافة باش تحيد الاعتراف بمغربية الصحرا من الجريدة الرسمية ديال إسبانيا