كود اكادير ////

موضوع متابعة الصحافية هاجر الريسوني بتهم الاجهاض و… كان حاضر فاجتماع المكتب السياسي لحزب التجمع الوطني للاحرار اللي دار هادي النهار فاكادير. الحزب وفق قيادي منه ل”كود” مع مراجعة للقوانين اللي كتحد من الحريات الفردية. وفق مصدر “كود” فان الحزب باغي يدخل تعديلات تقوي هاد الحريات الفردية.

منصف بلخياط العضو فالمكتب السياسي قال ل”كود” “المكتب السياسي تكلم على الحريات الفردية وشدد على ان هاد الحريات خاصها تكون فاحترام للقانون” بلخياط اضاف “كاين قانون جديد كيتم اعدادو وخاص مشاورات مع المجتمع المدني مع العلماء مع المتخصصين فعلوم النفس والاجتماع مع كاع فعاليات المجتمع المغربي باش يكون عندنا قانون متنور”. بلخياط قال”خاصنا نشتاغلو على الحريات الفردية ما تقاصش”

وفي سؤال ل”كود” حول الموقف الشخصي لمنصف بلخياط اللي كيدافع علي الحريات الفردية من متابعة هاجر الريسوني “ديما كان عندي موقف حداثي٬ وهاد السيدة كنعتابرها من سيدات المغرب. واخا ما عنديش كاع معطيات على الملف٫ وايلى كان عندها مبررات للاجهاض نتمنى تتابع فحالة سراح ويبث القاضي فالقضية فالاخير”