الجدارمية د گرسيف حجزوا 800 قرعة ديال الشراب فدار گراب بمنطقة حرشة غراس
كود اسماء غربي ///
زلزال كبير وقع فالبلاد. قضية منع مصطفى بكوري٬ رئيس مجلس ادارة الوكالة المغربية للطاقات المتجددة “مازن” من السفر الى دبي الاماراتية الاثنين اللي فات. دابا دازت 48 ساعة ومازال ما خرج حتى بيان. وكأن الامر كيتعلق بقضية عادية. ماشي بزعيم حزبي سابق ورئيس اكبر جهة اقتصادية فالمغرب وفوق هاد الشي رئيس مجلس ادارة “مازن”.
كلشي تالف. حتى حد ما عارف والو والو. هادي 48 ساعة غادية تكون دازت بحال شي قرن على بكوري وعلى عائلتو. راه تعذيب كبير. القضاء عندو مسؤولية اليوم. خاص النيابة العامة تخرج ببيان. خاصها توضح.
وفق مصادر متطابقة ل”كود” فان بكوري باش منعوه الاثنين ما خبروه بوالو. ما قالوش ليه علاش. هاد الشي ماشي عادي فبلد الحق والقانون.
مصدر مقرب من بكوري ل”كود” اكد باللي الحدث الوحيد اللي واضح هو منعو من السفر اما الباقي فلا هو ولا حزبو ولا صحابو ولا عائلتو ولا معارفو عارفين السبب.
كيفاش ما يعرف حد السبب والقضية وصلات حتى يخرجو شبهة التخابر مع دولة اجنبية فاشارة الى المانيا.
فوق هاد الشي السيد مازال مريض وبزاف تبعات اصابتو بكورونا. دابا ما راعاو لوالو: لا لمسؤول كبير فمؤسسة حيوية. لا لتاريخو لا للبلاد لا حتى شي حاجة. كان شي ملف يتقدم للعدالة ويخرج بيان وسدات مادام