وكالات //

مشاكل المغنية الميريكانية بريتني سبيرز مازال مابغاوش يساليو.

ذكرات بعض وسائل الإعلام الميريكانية ينقلو على مصادرهم الخاصة، أن بريتني كاتفكر في الاعتزال، ومدير أعمالها قرر يوقف التعامل معاها.

مدير أعمال سبيرز، “لاري رودولف”، كتب رسالة لباها جيمي سبيرز ومديرة الرعاية المعينة من قبل المحكمة، جودي مونتكَمري، وقال أن خدمتو مابقاتش مهمة لأن بريتني بغات توقف الغنا بمرة.

وفي الرسالة، أكد رودولف اللي خدم مع بريتني سبيرز أكثر من 25 عام أنه عمرو ماكان جزء من الوصاية أو أي قرارت صادرة منها.

ومن 2008 والمغنية بريتني سبيرز تحت الوصاية ديال باها، ودابا عيات وبغات تكون مسؤولة على راسها وتحس بالحرية.

وكانت محكمة ميريكانية، رفضات السيمانة الفايتة، طلب بريتني فـ رفع وصاية باها عليها، وهو القرار اللي كعاو عليه بزاف ديال الناس عبر العالم اللي تضامنو مع المغنية فـ صراعها من أجل حياة خاصة و عملية بعيدة على هاد الوصاية.