كود أكادير//

واقيلا هاذ اليامات اللخرين في عمر عمادة ديال حماد بلقاضي ونوابه لكلية الآداب بن زهر مابغاوش يساليو على خير. يالله دارو ليه صحابو شي تكريم باش يودع الكلية في انتظار التعيين ديال شي واحد آخر، ها البرلماني بوانو كايعاود يجبد واحد الضوسي ديال التوظيفات المشبوهة لي سبق لڭود كتبات عليه في الشهر عشرة ديال العام الفايت.

بوانو وجه سؤال شفوي للميراوي كايقول ليه بلي الناس دوزو جوج كونكورات لتوظيف ثلاثة ديال المتصرفين في كلية الآداب ابن زهر، وبلي هاذ الكونكور فيه خروقات وشكايات قدموها الناس لي دوزو.
بوانو كايسول كيفاش الوزارة لغات واحد المباراة وخلات الأخرى، وخا دازو فنفس النهار نفس اللجنة نفس الخروقات، واشنو غايدير الوزير باش هادشي ماتعاودش؟

المهم القضية ومافيها أن الكلية ديال الآداب في العهد ديال بلقاضي دارت قناة رقمية باش ينشرو فيها الأنشطة ديال الكلية، جابو ليها شي دراري وبنات يخدمو فيها بيما يخرجو ليهوم كونكور ويوظفوهوم نيت في الكلية، دار الإعلان ديال الكونكور والناس دوزات الامتحان نهار 5 غشت 2021، جاو الناس يدوزو الكونكور على نيتهم، ماعرفوش بلي لائحة الناجحين هوما نيت الدراري لي خدامين شحال هاذي فالقناة.

لي تلاقاو مع أمزازي قبل المباراة وسجلوا معاه واحد البرنامج، وسجلوا معاه بعد المباراة، وملي علنوا السميات كانوا هوما نيت لي كانو تما شحال هاذي.

باستثناء واحد المباراة راه الكلية ضربات الطم، ماعلناتش شكون نجح فيها، ولكن لي بغاوه ينجح راه خدام نيت معاهم لحد الساعة. وهي لي قال بوانو للوزير في السؤال ديالو بلي “قامت الوزارة بإلغاء نتائج مباراة متصرف من الدرجة الثانية في تخصص الإعلام في حين أفرجت عن النتائج النهائية لمباراة المتصرفين في تخصص تقنيات الإعلام”، وخا الكلية ماقالت والو، ولي سولهوم كايقولو ليه مازال ماسالات المباراة.

بوانو زعما كايسول الوزير “ما هي الخطوات التي سوف تتخذها الوزارة مستقبلا لضمان الشفافية وتكافؤ الفرص في المباريات التي ستحتضنها هذه المؤسسة الجامعية؟” حيث الهضرة كاتدور على مناصب جاية في الطريق في هاذ الأيام الأخيرة من عمر العميد لي دوز جوج ولايات، هاذ الأيام اللخرانية لي زاهية فيها مناقشات ديال الأطاريح الجامعية ديال الدكتوراه، ماكاين غير عشرة الأطروحات للفوق في السيمانة، ويا مولا نوبة.