وكالات //

كتعيش أم ميريكانية حالة نفسية خايبة بزاف بعدما لقات ولدها الصغير اللي نساتو بالغلط وسط طوموبيلتها ميت.

الأم كانت مشغولة كتوجد لعيد ميلاد بنتها اللي يلاه عندها 8 سنين ونسات ولدها اللي عندو 5 سنين فالطوموبيل أكثر من ساعتين دالمكَانة، ومللي تفكراتو كان فات الفوت حيت لقاتو مسكين ديجا مات بالصهد.

الأم غادي تسطا حيت تبدلات حياتها فرمشة عين، كيفاش كانت فرحانة بلانيفيرسار ديال بنيتها وكت جد وكتزوق كلشي، شوية كتلقى راسها تسببات بالغلط فموت ولدها الصغير. صدمة قاسحة بزاف.

https://m.youtube.com/watch?v=6y8LD4vLbyM

جورنال “ديلي ميل” البريطانية قالت أن الحادثة وقعات فمدينة هيوستن (ولاية تكساس)، الإثنين الفايت فاش كانت الحرارة فاتت 37 درجة.

وكتبو بعض المعلقين فموقع “يوتوب” أن هاد الحادثة المأساوية ممكن توقع شحال من مرة، وهضرو على مشكل الضغط ولاشارج مونطال اللي كتكون عند كثير من العيالات فمجتمعاتنا الذكورية، سوا بالنسبة للمرا اللي أونكوبل أو الأم عازبة، خايبة وقاسحة بزاف حقاش كتلقا راسها تقريبا يوميا خاصها تدير بزاف ديال الحوايج ومهام أسرية بالخصوص وأيضا تقضي أغراض كثيرة على برا، وغالبا كيكون الوقت، وهكذا كتقدر توقع حوادث بحال هادي ديال هاد الزغبية اللي نسات ولدها مسكين حتى مات.. فالوقت اللي بوالركابي كتلقاه مجلوق و”مامساليش” أو مامسوقش كَاع وماكيعاون فوالو.