محمد سقراط-كود///

فاش تحكمات هاديك بنت مراكش بتلات سنوات ونصف حيت حرفات آية ديال القرآن ومن بعد منها بنت واد زم بعامين بتهمة الإسائة للإسلام، وفي رمضان فاش شاف المغرب كامل السطافيط واقفة قبالت قهوة وشباب زوينين قاريين لابسين مزيان تاواحد فيهم ممزوج تلاتة ديال العيالات والا قادر أصلا وتاوحدة معندها تلاتة دالرجال يقدرو يكونوا بيست فراندات وصافي، جمعاتهم السطافيط بتهمة كلاو رمضان في مشهد لا صلة له بهاد البلد الآمن المعتدل المتسامح، ومن بعد كاين البنات لي قالو أنهم تقلبوا واش عندهم عذر شرعي للأكل أو لا، هادشي راه في السعودية معقل المد الوهابي ومابقاش، وحتى تركي آل الشيخ حفيذ عبد الوهاب شخصيا ومابقاش مع هاد الهيت، في داك الوقت كتبت في موقع كود مقالات رؤيوية حول أن هادي هي الوصفة والتخليطة لي كتمهد لشي عمل إرهابي جاي في الطريق، حيت فاش كتنوض الدولة تحارب الشباب الواعي القاري المسالم المحب للحياة لي معندوش مع الحلال والحرام كتضصر اللحايا والمتطرفين وأمثال مول الفوقية باش يحرضو ضد المواطنين الآمنين وياخدو راحتهم في التكفير ديال الناس بحال لي طرا مع موقع كود، وباش يبثو السموم ديالهم في أدمغة الشباب.

قبل تفجيرات الدار البيضاء ناضت الدولة شدات شباب كيتصنتو موسيقى الروك وسماتهم عبد الشيطان وسيفطاتهم للحبس ودمرات ليهم حياتهم، من وراها بشوية خرجوا ليها عبدة الله فركعو كازا كاملة العام لي فات شدات الدولة وكالين رمضان جمعاتهم من قهوة وحكمات على مدونين بالحبس حيت أساؤو للدين الإسلامي وفي نفس الوقت مول الفوقية لي كفر موقع كود وتاهمني بالإلحاد خلاتو يصول ويجول ويوزع أملو وفتاوى التكفير في المغرب كامل والنتيجة قتل وحرق شرطي بريئ والتنكيل به، وقبله قتل موظف السجن من طرف ارهابي تشد غي شوية قبل مايكم المخطط ديالو، راه مايمكنش تخلق التوازن وتشد السمطة من الوسط راه يا تقابلنا الدولة حنا يا هوما.

المجهود لي كيدير المغرب في محاربة الإرهاب راه كبير ومتطور وفعال ولكن للأسف ضروري يفلت شي ذئاب منفردة، ولكن في نفس الوقت المجهود لي كيدير المغرب في دعم قيم الحداثة بحال التي يدعو لها موقع كود راه غير كافي وبزاف بل العكس كاين تضييق على الحريات، في الألفينات في عز التشدد والإرهاب كانو الناس كياكلو في ماكدو عادي وكانوا قهاوي كيحلوا في رمضان، وكانوا المغاربة يقدروا يتعرضوت بالنقد أو السخرية لأي حاجة بلا قيود أو شروط، دابا حاليا الوقت زامتة وسادة وحدة ضحكات في فايسبوك عطاوها عامين حيت من واد زم، وبغاو بنادم مايتطرفش وآش يدير، مادام الدولة كتعاقب على الجنس خارحج اطار الزواج وعلى الطاسة وعلى الحداثة وعلى النقد والسخرية والإختلاف وفي نفس الوقت تخلي المتشددين سارحين في عباد الله ويكقدمو نسخة متطرفة من الإسلام وهانية هاهوما كيحاضرو في المدارس العليا كاع.