كريم الصوفي – كود//
[email protected]

قالت وكالة أوروبا بريس الإسبانية، رئيس محكمة التعليمات رقم 7 في سرقسطة، واللي مكلف بالتحقيق ف فضيحة تهريب بن بطوش صيفط إنابة قضائية للدزاير باش تدار اونكيط ف الباسبور المزور.

وحسب المعطيات المتوفرة، هاذ الإنابة فيها أسئلة محددة حول الرقم الموجود في الباسبور والمعطيات اللي مذكورة ف الضوسي الطبي ديالو اللي دخل بيه للصبليون بما يضمن ان هوية الشخص مؤكدة، انطلاقا من تاريخ قبوله في أبريل 2021، وهبوط طائرته الطبية فوق الأراضي الإسبانية، انطلاقا من الدزاير دون المرور عبر مصلحة أمن الحدود ف المطار.

واضافت وكالة “أوروبا بريس” أنه حسب لوثيقة السفر المذكورة، فإن محمد بن بطوش، الاسم المستعار اللي دخل بيه غالي للصبليون ، من مواليد 19 شتنبر 1950، لكن كاينة وثيقة هوية أخرى صادرة عن السلطات الجزائرية كيحمل اسم إبراهيم غالي مصطفى، وفيها انه مواليد 18 غشت 1949.

وطالب قاضي التحقيق الإسباني ف هاذ الإنابة القضائية، من السلطات القضائية الجزائرية ارسال نسخة من الباسبور ديال زعيم البوليساريو للمساعدة في التحقيق، تطبيقا لبنود اتفاق التعاون القضائي الموقع بين البلدين في عام 2002، واللي كينص على التزام الطرفين بتقديم الدعم المتبادل.