الرئيسية > آراء > في أي فيديو ديال شي سائح في المغرب مستمتع باللحظة وكيشرح وينقل معلومات كتلقى شي كائن طفيلي كيبعث معاه في الكادر باغي ياخدو لبلاصة ماحسن أو يوريه فين ياكل ومنين يدوز و من عندمن يشري وكيقتل ليه متعة السياحة والإستكشاف
07/05/2022 17:00 آراء

في أي فيديو ديال شي سائح في المغرب مستمتع باللحظة وكيشرح وينقل معلومات كتلقى شي كائن طفيلي كيبعث معاه في الكادر باغي ياخدو لبلاصة ماحسن أو يوريه فين ياكل ومنين يدوز و من عندمن يشري وكيقتل ليه متعة السياحة والإستكشاف

في أي فيديو ديال شي سائح في المغرب مستمتع باللحظة وكيشرح وينقل معلومات كتلقى شي كائن طفيلي كيبعث معاه في الكادر باغي ياخدو لبلاصة ماحسن أو يوريه فين ياكل ومنين يدوز و من عندمن يشري وكيقتل ليه متعة السياحة والإستكشاف

محمد سقراط – كود///

كاين فيديوات كثار ديال أجانب كيصورو في المغرب وفي الوقت لي كيكونوا مستمتعين بالجمالية ديال شي بلاصة وكيعاودو عليها ويعطيو معلومات وينقلوا الإنطباع ديالهم عليها، حتى كيبعث معاهم شي واحد ويتخشى في الكادر بلا خبار سيدنا عيسى ويبدى يبجغط معاهم بشي لغة مخربقة، وفي الغالب كيبدى يعرض عليهم يساريهم أو يديهم لبلاصة خرى أو يطلبهم يدورو معاه، خصوصا في الأماكن السياحية لحظة سكون وحدة ماتلقاهاش، وحتى فاش كيدخلوا السياح لشي مدينة قديمة كتلقى الفيديو كامل لي صورو عبارة على التلصاق ديال الناس فيهم، ودعوات للشراء أو الماكلة المهم شري شي حاجة أو دير شي حاجة ماتبقاش غير غادي جاي تصور فينا بلا فايدة، داك البياع والشراي لي عندو نخوة ويتسناك حتى نتا توقف وتدخل وتسول عاد يهدر معاك كاع مابقى، دابا كاين واحد الخليط بين التجارة والسعاية ماشي حتى التسويق حيت كاين فرق بين أنك تسوق للمنتوج ديالك وتعرضو على الناس بالهدرة، ومن أنك تلصق شي واحد وتبقى تابعو كتجرو يشري من عندك شي حاجة لي يقدر يشريها غير باش يتفك منك ونتا عندك هانية.

هاد التلصاق مكيطراش غير مع السياح الأجانب بل حتى المغاربة حتى كتكرهراسك، مثلا أسرة داخلين لعين أسردون لي هي بلاصة زوينة بزاف وباغين يستمتعوا بالبلاصة، مع الدخلة غادي يلصقوا فيهم النقاشات، غير يتفكو منهم غادي يلقاو شي مول اللعب عطا لولدهم أو بنتهم شي نفاخة أو شي تخربيقة وطلقها عند واليديها، قالب خدام منذ الأزل ديال تعرض الواليدين للإحراج، حيت كيكونوا الأطفال شدو الحاجة وماجاتش تعاود تحيدها ليهم كيفضحوك بكى، كتفوتوا كتلقى صحاب الطواجن نتا باغي تمشى وتنزه وهوما باغين يكلسوك عندهم مع الحداش ديال النهار تبقى مريح تتسنى في الطاجين غادي يطيب حتى للجوج ويكثرو ليك من أثاي والسكر، وطبعا النهاية السعيدة كتكون مع الكارديان كيف العادة.

بزاف ديال المناطق في البادية والجبال كيضابفوك واخا مايعرفوكش يتلاقاك الواحد يقوليك دوز تشرب واخا غير كاس ديال أتاي دوز تغدى وخصوصا فاش كتكون براني خاصك تدي متعاود على الكرم والظيافة المغربية الحقيقية، على عكس ما يقع في المدينة هادشي ماشي تلصاق بل كرم وسخاوة وبالنخوة والعز الواحد واخا مايكون عندو والو يعرضك خبزة يقصمها معاك وبلا طمع ماباغي منك والو غير غادي يقوم بالواجب لي ترباو عليه المغاربة الأصيليين، أما في بلايص السياحة راه الى عطاك الواحد خبزة خاصك تنكرى منو حيت العالم الله شحال غادي تقام عليك، هاد التلصاق راه لا يشرف المغاربة كشعب عندو نخوة وكرامة، وراه معاناة يومية سواء للسياح أو للمغاربة نيت، نتا غادي في أمان الله باغي غير تنزه وبنادم لاصق ليك عند تحت ظهرك باغي يبعليك شي لعبة نتا ماباغيهاش أو يوريك فين تتغدى أو تاكل وفين تريح ومنين تدوز.

موضوعات أخرى

28/03/2024 14:45

بوليس سيدي قاسم شدو 4 فيهم واحد قاصر بانو ف فيديو هازين السيوفا وكيسبو فمؤسسات وموظفين عموميين وكيحرضو على تنفيذ اعتداءات

28/03/2024 14:28

واش الحكومة غاتحل الحمامات مور الشتا لي طاحت.. بايتاس لـ”گود”: على حسب كل إقليم والوضعية ديال الماء فبلادنا صعيبة ونسبة الماء لي دخلات للسدود ضعيفة

28/03/2024 14:22

تعيينات جديدة فمناصب عليا دازت اليوم فمجلس الحكومة: منهم مدير المحروقات ومدير الموارد البشرية فوزارة الخارجية

28/03/2024 14:00

“الهاكا” مسؤولة على فضيحة “مومو” مع “هيت راديو”. كيفاش تعطلات تخرج قرار فاكثر منشط عاقباتو

28/03/2024 13:30

وزير النقل للساقطين فامتحان البيرمي: غانعطيوهم فرصة جديدة ومغاديش يتحسب امتحان الاثنين والهدف من الأسئلة الجديدة هو نقصو من الكسايد

28/03/2024 12:45

ليلة “العشاء الأخير” فحزب الاستقلال: هادي 3 قضايا كبرى غادية تشعل حروب ف “الميزان” قبل وبعد المؤتمر