الجزء 5.. ورقة صاوبها گوتيريش حول نزاع الصحراء للجنة الرابعة: الحالة فمخيمات تندوف تدهورات والسياق الصعب خلى التفاوض حاجة ضرورية
محمد سقراط-كود///
مابقيناش نقدرو نتفرجو التلفازة مع واليدينا مابقيناش نقدرو نخرجو للشارع مع واليدينا، مابقيناش نقدرو نمشيو للبحر مع واليدينا، تبغي غير تفرج شي فيلم في السينما مع واليديك ماتقدش، نتفليكس منقدرش نتفرج فيها مع الواليدين شبعانة ألوان، وكتلقى لي كيقول هاد الهدرة راجل بلحيتو ماشي شي برهوش مافايتش عشر سنين، واحد كيطل على ربعين عام وباقي ماتفطم من البزولة وفي الواقع راه عمرو مادار شي نشاط مع واليديه من غير السريط والمريط ودوك الخرجات ديال الطبيعة لي فيهم الرحيل ديال الدار كامل مخرجينو ومكاين لا روندوني لا والو، مكاين غير فرش في الحصاير وطلق الكوكوط كتصفر وبنادم منشور بحال الى مضروب بغاز السارين، صالونهم وعقلية الصالون كيديوها معاهم فين مامشاو بنادم منشور في السدادر كيخرج يفوج كيتنشر في الكازو أو الرملة أو حصيرة أو حجرة.
المهم إنسان كيتحرك كيدير رياضة كيخرج للطبيعة يدير نشاط هاداك قليل وبزاف، كتلقى بنادم عندو ستين عام وفيه الأمراض ديال صحاب مية إلتهاب المفاصل الروماتيزم القلب الكلاوي السكر، في المقابل كيبان ليك كروب ديال السياح فايتين تمانين عام لابسين الشورطات وسبرديلات وكيضلو يكعطو بلا توقف وكلهم شادين في صحتهم وواقفين على الصح, في أوروبا والدول المتقدمة الدري او الدرية فاش كيديرو 18 كيخرجو من دار واليديهم وكيمشيو يقلبو على راسهم وكيعيشو حياتهم بإستقلالية، وكيطوروا شخصياتهم بعيدة على واليديهم باش يفهمو ويعيشو الحياة من منظورهم الخاص.
حنا راجل بولادو وباقي كيتشاور مع مو في أيتها حاجة، مو لي زايدة عام يرني وماشافت التلفازة حتى لتمانينات أو تسعينات وعاشت في مغرب واحد آخر متخلف مقودة عليه جيعان فيه القمل والصيبان والجذري الحمقة وكيتداواو غير في السوق عند الكواي أو يديرو حجاب عند الفقيه ويرجعوا للدار، وكتلقى ولدها لي زايد وكابر وقاري وعايش في ظروف حسن منها وفاهم عليها كيتشاور معاها على أيتها حاجة في حياتو، وتوب ديال التلامط الى بغا يشريه يتشاور مع مو في اللون والنوع، وطبعا هذا هو النوع لي كيبدى عليك بديك مابقيناش نقدرو نخرجو مع واليدينا، وفي الغالب هو ساكن في حومة كتلقى فيها البرهوش عندو عام كيخسر الهدرة ملي كيفيق حتى ينعس وتلقى الدراري مجمعين ليه تحت الدار يوميا ومكاين غير الهدرة الخاسرة، ومع ذلك عوض ينزل ليهم أو يعيط على البوليس كيدخل للفايسبوك وفين ماشاف شي حاجة ماعاجباهش يبدى عليك بديك الهدرة ديال مابقيناش نقدرو نخرجو مع واليدينا، قدك نتا راه خاص تكون عندك حياة خاصة ماشي تبقى عايش تحت جناح واليديك.