باغاو يعوضو الجمهور على لقاء اتحاد العاصمة: نهضة بركان دارو الدخلة فماتش ليفار فكأس العرش غير بـ10 الدراهم
عبد اللطيف اگنوش أستاذ باحث في جامعة الحسن الاول سطات ////
الصديق والأستاذ حكيم بلمداحي أخبرني، وأخبر القراء، بللي واحد “الخطيب” ديال الجمعة، طلق لسانو في واحد الموضوع خطير جدا، وهو “التعزير وتطبيق الحدود”…
هاذ المندوس، أو المندس، بحال بحال، دعا إلى «قطع الأيادي بدل عقوبة المؤبد أو غير المؤبد»، مضيفا بأننا لسنا في حاجة «لتشريعات أجنبية لأنها تمس بهويتنا»، واعتابر بللي «السياح الكفرة» كايجيو للبلاد غير على قبل المخدرات والشذوذ الجنسي…وما عايقش بللي راه كايحررض على “السياح الأجانب” من حيث لا يدري…لأن المسططين راهوم ماخطاوش البلاد…دابا هاذا واش عايش هنا ولا شاد الخارج؟؟
واش الخارج ديال أوربا ولا ديال “سوريا والعراق”؟؟
واش هاذ الشي بخبار السي “أحمد التوفيق” ولا لا؟
واش هاذ الشي بخبار ذاك الباكور ديال “المجلس الأعلى للعلماء” للي خصصو دستور المملكة للإفتاء، ولا “أوهو”؟؟
واش هاذ المندوس ولا المندس كاينتامي للإسلام الوسطي المعتدل والمعقلن، ولا للإسلام الحنبلي ديال بداوة شاربي بول البعير وخوتهوم من “داعش”؟؟
إيلى كان بخبار وزير الأوقاف السي التوفيق، راه المسألة خطيرة جدا…
وإيلى كان بلا خبارو، راه المصيبة أعظم…
إيلى كان بخبار الاستعلامات ديال البلاد راها مصيبة…
إيلى كان بلا خبارها، راه المصيبة أعظم، إيلى ما تدار والو…
كيفاش، آالشرفا، تقوقلو ليا: “حنا بلاد ديال الإسلام الوسطي المعتدل”، وتقوقو ليا: “حنا البلدان الأوربية كاتطلب منا المساعدة في تكوين الأئمة والخطباء”، والسفارات ديال الأجانب كاتشوف بحال هاذ الكوارث كاتخطب على المغاربة يوم الجمعة في هاذ المواضيع؟؟
كيفاش تسمحو بهاذ المصائب في وجود مقتضيات واضحة ديال دستور البلاد في مجال “حداثة القواعد الدستورية السامية” التي لا تسمو فوقها أي قاعدة واخا تكون دينية؟؟
المصيبة أن هاذ الشي للي تكلم عليه الأستاذ بلمداحي، ماشي معزول على ما سمعت من كثير ديال الأصدقاء في أماكن متعددة من البلاد…
وعليه فين هو “تدبير الحقل الديني” للي تعاقدو عليه المغاربة معا المؤسسة الملكية بعد خطاب 9 مارس 2011؟؟ أكيد أن “الملك أمير المؤمنين” ماغاديش يتبع كاع “القيمين على اشتغال الحقل الديني” عبر ربوع المملكة…ولكن آشنو كايديرو “حراس المعبد” من مدنيين وساسة و”علماء”، ومجالس جهوية للعلماء، وكاع داك الباكور للي مصددعينا بيه طول السنة في التليفزيونات والراديوات؟؟؟
كيفاش الخطيب باقي ماعارفش بللي البلاد فيها دستور، وفيها قوانين جنائية، وبللي راه المغاربة ماعندهومش مصطلح “الطاغوت والطواغيت” في دماغاتهوم، إلا من “نسي ربك من رحمته”؟؟ كيفاش هاذ الخطيب ما مكونش وما قاريش، ولا؟؟؟ وإيلى ماكانش مكون، كيفاش باغين تكونو أئمة وخطباء ديال بلادات الناس؟؟؟
1