كود كازا ////

وجه الاتحاد الدولي لكرة القدم “فيفا” ضربة قاضية للرجاء بعقوبة جديدة غادي تخليه غارق في الأزمة ديالو وتقدر تسبب ليه مشاكل كبيرة مع “فيفا” والجامعة، وهاد القرار غادي اشوه بودريقة، لعيا ميتهرب من الحقيقة ديال اللاعب السابق للرجاء الغاني أسمواه.

“فيفا” حكم على الرجاء بأداء مبلغ كيفوق 180 مليون سنتيم للاعب والفريق ديال الغاني، عقوبة على التماطل في أداء لفلوس باش شرى اللاعب من الفرقة ديالو.

وكذب “فيفا” بودريقة لكل مرة كيتجدب فيها الموضوع ديال اللاعب أسمواه، كيقول هو عندو وثيقة كتأكد أن الفرقة ديال أسمواه تنازلات على فلوسها، ولكن الحكم ديال فيفا كيكذب بودريقة، وكيأكد أن الفريق متنازلش على فلوسو ومشى للفيفا، وهاهو خداهم بالقانون.

الحكم الجديد غادي ازيد عليه الرجاء الحكم ديال القربي لحتى هو غادي تخلص ليه الرجاء 105 مليون سنتيم، يعني الرجاء خاصه اخلصو 300 مليون سنتيم تقريبا، وماشي الوقت لبغاو، لأن الفيفا عطاهم آجال حتى 20 في الشهر الجاي، إلى مخلصوش تفرض عليهم عقوبات جديدة، تزيد تكرفسهم.

هاد المشاكل كاملة لكتعيشها الرجاء بودريقة هو المسؤول الأول عليها وهو لخلى الرجا غارقة في الأزمة والمشاكل، ومازال كيدير تصريحات كيكذب فيها على الجمهور ديال الرجاء بحال هاد القضية ديال أسمواه.