الرئيسية > آراء > فعوض التقنية تحارب الجهل كتزيد ترسخو وكتطورو.. وفعوض التحديث يجيب الحداثة وقع العكس زادو ترسخو بعض القيم ديال القرون الوسطى: هاكيفاش غسلت رجلين راجلي وقلقت راجلي وغضب عليا وقطع المصروف
22/06/2019 15:00 آراء

فعوض التقنية تحارب الجهل كتزيد ترسخو وكتطورو.. وفعوض التحديث يجيب الحداثة وقع العكس زادو ترسخو بعض القيم ديال القرون الوسطى: هاكيفاش غسلت رجلين راجلي وقلقت راجلي وغضب عليا وقطع المصروف

فعوض التقنية تحارب الجهل كتزيد ترسخو وكتطورو.. وفعوض التحديث يجيب الحداثة وقع العكس زادو ترسخو بعض القيم ديال القرون الوسطى: هاكيفاش غسلت رجلين راجلي وقلقت راجلي وغضب عليا وقطع المصروف

محمد سقراط-كود//

دوك جوج دراري لي كان دوشو فالطوبيس فاكادير وناضت عليهم قربالة تحكم عليهم بشهرين ديال الحبس والعذاب لواليديهم، وفنفس الوقت تشد واحد آخر فمكناس صور فيديو واقف قبالة التران مغامر بحياتو وحياة الركاب باش يصور فيديو خطير لي يدير بيه البوز فاليوتوب ويجيب بيه متابعين كثر فالقناة ديالو، وقبل منهم شفنا كيفاش عيالات ولاو يصورو روتينهم فبيت النعاس مع رجالهم، وكيفاش نوضاتها مي نعيمة مع قناة مربوحة وخبارهم جابها الغادي والبادي، وبزاف ديال القصص ديال ناس مشاو الحبس أو ولاو لاباس عليهم بزاف غير من يوتوب، هاد القصص لي خلات المغاربة يهبطو السروال قدام الآدسنس، ويولي البعض منهم كيغامر بحياتو وحياة الناس باش يحقق المشاهدات، أو يدير سلوكات فيها خرق للقانون وكتشوه البلاد.

هادشي راه مفيد نوعا ما لأنه كيبدل عقلية المجتمع، وفالوقت لي كانو المغاربة مثلا كيحرصو على السر ديال الديورهم، هاهوما ولاو مشرعينهم فيوتوب عالله غير يجي شكون يشوفهم، وهادشي وفر دخل مهم لبزاف ديال ربات البيوت او النساء العاملات، وحتى الشباب، ولكن هاد المنافسة في الإسفاف لي غادين بيها راه ماغادا توصلنا لفين، الطوندونس المغربي بدائي بحال إلى هاد أكثر من  العشرين عام ديال الأنترنيت فالمغرب مشات غير فالخوة ودابا عاد بداو المغاربة يكتاشفوه ويحطو فيه راسهم وبياناتهم، وحتى اللحايا والمنقبات لي مغطيين راسهم زعمة وديما كيهدرو على السترة والعورة والحرام وحلال، ستحلاو فلوس اليوتوب وبقاو مغطيين راسهم ولكن عراو حياتهم للناس بمقابل مادي، هنا باش تعرف بلي العقيدة الحقيقية راه هي موكة أما الباقي غير روايات.

غير هو فعوض التقنية تحارب الجهل كتزيد ترسخو وكتطورو، وفعوض التحديث يجيب الحداثة وقع العكس زادو ترسخو بعض القيم ديال القرون الوسطى، وأصبح التباهي بهاد القيم هو لي كيدخلو بيه الفلوس، هاكيفاش غسلت رجلين راجلي، قلقت راجلي وغضب عليا وقطع المصروف، شوفو كيفاش تهليت فأم راجلي، واحد التباهي مبالغ فيه بدور الخادمة والعبدة والجارية للرجل من طرف المغربية اليوتوبر، في حين أن هادوك لي كيعبرو على أفكار متحررة كنلقاو أغلبهم خارجين ليها طاي طاي ومتحررات غير على ود الصرف والعراضات ، وناويين من بعد الإحتراف فالدوري الخليجي يتوبو ويسيفطو واليديهم للحج ويديروه وما العمرة، ولحد الآن الأنترنيت فعوض يكون وسيلة باش نكتاشفو الحضارة ونوعاو ونستهلكوا إنتاجات الشعوب المتحضرة نضنا حنا نقلنا ليه الكلخ ديالنا وتخلفنا وولينا نتباهاو بيه وندخلو بيه الصرف.

 

موضوعات أخرى

28/03/2024 23:00

الفيفا طالبو الصبليون يوضحو لهم تهم الفساد المالي الموجهة للرئيس السابق روبياليس وللمعتقلين فالقضية

28/03/2024 22:35

اشناهي المواد الغذائية الفاسدة اللي تشدات ف15 يوم درمضان؟ 402 طن فيها 106 من التوابل و60 طن من العصير و35 طن من لحليب و34 طن من السكر واتاي

28/03/2024 22:30

لشكر شتت تنسيق المعارضة.. زرب على بنعبد الله وبنكيران وأوزين وعلن رسميا باسم المعارضة على ملتمس الرقابة

28/03/2024 22:00

الأمير هشام العلوي عطا محاضرة فمعهد الدراسات السياسية فباريس على دور السياسة فالتقدم الاقتصادي فمنطقة الشرق الأوسط و دار مقارنة بين الانظمة ديال الخليج و ديال شمال افريقيا

28/03/2024 21:30

ضوسي السمسرة القضائية.. غرفة الجنايات بكومناف حكمات على عصابة ريبكو ليفها قضاة ومحامين وسماسرة بالحبس والغرامة

28/03/2024 21:00

يكذب الإسلامي وهو يتحدث عن تفكك الأسرة في الغرب! نحن روحانيون وأسرنا متماسكة وأطفالنا يكبرون في الشارع بعناية إلهية

28/03/2024 20:30

لاگوارديا سيپيل شدو جهادي صبليوني من أصل مغربي نشر رسائل مشفرة لدعم داعش وشروحات حول كيفية تصنيع المتفجرات