عفراء علوي محمدي- كود//

علن فريق بحث مغربي فرنسي إيطالي، على تاريخ بقايا الأطوار القديمة اللي كتعود على الثقافة الأشولية، واللي تكتشفات فموقع طوما1 فكازا.

وكشف الفريق، حسب بلاغ للمعهد الوطني لعلوم الآثار والتراث، أن الآثار المكتشفة كتعود لما قبل مليون و300 ألف سنة، وكتشكل دابا أقدم دليل على هذ الثقافة اللي كتعود للعصر الحجري الأدنى.

وكيتميز الطور القديم للثقافة المادية الأشولية بصناعة أدوات كبيرة فالحجم،  وشهدات على تطور تكنولوجي كبير فمرحلة التطور البشري.

وبان هذ الطور لأول مرة فإفريقيا الشرقية عن مليون و800 ألف عام، وبإفريقيا الجنوبية بين مليون حتى لمليون و600 ألف عام.

وتم اكتشاف أقدم الشواهد المادية المتعلقة بالثقافة الآشولية فالمغرب، بمنطقة كازا، وبالضبط فالطبقات الأثرية المعروفة بالمستوى الأركيولوجي ل بموقع طوما 1، واللي كتعرف حفريات وأبحاث منتظمة من 1985، من طرف فريق بحث مغربي فرنسي.

وقدر فريق الموقع يحدد تأريخ للآثار بناء على الدراسات المغناطيسية والجيوكميائية المنجزة مؤخرا في طبقات السلسلة الجيولوجية البلايستوسينية للموقع، والاعتماد على معطيات ودراسات وتأريخات توصل ليها البحث فالسنوات اللي سبقو.