عفراء علوي محمدي- كود//

أجلات محكمة الاستئناف ديال الرباط، اليوم الإثنين، الجلسة الأولى ديال محاكمة المحامي ميلود عبوز حتى ل20 ماي، واللي كتم متابعتو بتهم “سب مسؤولين والمس بمؤسساتهم الدستورية”، بسبب تدوينات ف”فيسبوك”.

وعلى الرغم من أن التجمعات ممنوعة فهذ الفترة ديال حالة الطوارئ الصحية، عشرات المحامي التابعين لهيئة الرباط، اللي سجلو النيابة ديالهم للدفاع على عبوز، جاو للمحكمة، واحتجو فبابها بعد رفض هيئة الحكم بطلب سراحو، على اعتبار أنه كبير فلاج ومريض.

وعلى عكس باقي المعتقلين اللي دازت ملفاتهوم اليوم، أصرت النيابة العامة على حضور عبوز فجلسة اليوم.

وغير الخميس اللي فات، حكمات المحكمة الابتدائية بالخميسات على عبوز بشهرين دالحبس النافذ، بعد اعتقاله لمدة كتجاوز شهر فسجن تيفلت.

واستنكرو رواد مواقع التواصل الاجتماعي إدانة عبوز ابتدائيا بسبب تدوينات، وقالو بللي هذا استهداف لحرية التعبير.