عفراء علوي محمدي- كود//

الما مقطوع فشي بلايص فأحياء مولاي رشيد ولالة مريم فكازا، فالوقت اللي الما ضروري اليوم فعيد الكبير للنظافة من مخلفات الحولي والذبح.

مواطن تواصل مع “كود” على هذشي، وقال أن الما تقطع هذي كثر من جوج سوايع، وليديك ماعملتش كَاع السكان باش يديرو احتياطاتهم.

وزاد أنه اتصل بلاجونس التابعة للحي، وعلموه انهم غيحاولو يلقاو شي حل، وطلبو منهم يصبرو شوية حيت الضغط على الما كيكثر نهار العيد، حيت الاستهلاك ديالو كيطلع.

وكشف أن ساكنة الحي علنات الاستنكار ديالها بسباب هذ القطيع فالما غير المتوقع، ومنهم أشخاص خرجو يحتجو فالزنقة، مطالبين بالحل.

وحاولات “كود” تتواصل مع المكلف بالتواصل فوكالة الماء والضو والتطهير الصحي “ليديك”، باش تستفسرو على هذ المشكل، لكن تيليفونو صونا بلا جواب.