الرئيسية > آش واقع > فضيحة.. نوطير فكازا دخل للبرلمان فوق التراكتور.. تعطاتو رخصة ديال مشروع سكني ضخم خارج القوانين واللي سول كيفاش يقول ليه “من الفوق” والمتهم الوكالة الحضرية والداخلية وشي منتخبين
29/03/2023 14:30 آش واقع

فضيحة.. نوطير فكازا دخل للبرلمان فوق التراكتور.. تعطاتو رخصة ديال مشروع سكني ضخم خارج القوانين واللي سول كيفاش يقول ليه “من الفوق” والمتهم الوكالة الحضرية والداخلية وشي منتخبين

فضيحة.. نوطير فكازا دخل للبرلمان فوق التراكتور.. تعطاتو رخصة ديال مشروع سكني ضخم خارج القوانين واللي سول كيفاش يقول ليه “من الفوق” والمتهم الوكالة الحضرية والداخلية وشي منتخبين

سعيد الشاوي – كود///

بزاف ديال المنعشين العقاريين، تفاجئو بالطريقة اللي داز بيها ترخيص تاع ملف ضخم للسكن الاقتصادي، وكيفاش الوكالة الحضرية غمضات عينيها، ودوزات الضوسي، وكيفاش باقي المتدخلين قالوا آمين، رغم أن الوكالة نفسها وقفات حجرة عثرة أمام جوج ضواسة تيشبهو ليه، من حيث مسألة “الديروگاصيون” يعني الرخصة الاستثنائية اللي حصل عليها هاد النوطير اللي هو فنفس الوقت منعش عقاري مع واحد الشريك تاعو سميتو موخوذة من العطرية.

هاد الجوج، النوطير وصاحبو، باين بلي عندهم شي عطرية مضيراش، نقولو ليكم علاش، الأمر يتعلق بـ48 هكتار كاينة فبوسكورة بإقليم النواصر، والتيتر فونصيي تاعها رقمو دي 26460، والمشرا أي كيفاش حصلو عليها، الله ينجينا وينجيكم من السيزي، حيث كانت معروضة من واحد البنك معروف ديال عثمان بنجلون باش ما نقولوش السمية.

النفوذ اللي عند النوطير هو أنه فنفس الوقت عضو في لجنة الداخلية بالبرلمان، اللي كان تيترأسها صاحبو الباميست، خلا هاد الضوسي يتقبل ويحصل على الترخيص وخا سالات الدولة من الديروكاسيون، وواخا التصاميم اللي دارها السي النوطير وصاحبو العطرية، ديال الفيلات والسكن الاقتصادي، مخالفة للتنطيق، والضوسي تيورط الوكالة الحضرية بالأساس وواحد المنتخب كبير ما كبير غير الله، كيقول باللي كيتحكم في التعمير فكازا واخا ما عندو حتى لجنة.

دابا هاد النوطير وصاحبو ومعاهم حتى داك المنتخب وشي وحدين، ملي تيسولهم على فضيحة الترخيص للنوطير، تيجابوه بلي داكشي جاي من الفوق، وهاد من الفوق باقا خداما زعما واخا شي وحدين تيدعيو الشفافية والنزاهة والاستقامة.

المهم هاد الديروكاسيون، المشبوهة، تقبلات واخا الوكالة رفضات ضواسة تاع الديروكاسيون، وثانيا القضية راه من الأول باينة، حيت هاد العقار اللي غيدخل أرباح تفوق 50 مليار، سبق شي وحدين بغاو يشريوه من البنك، ورفضات ليهم بدعوى ضمان الديروكاسيون، حيت متفوتش عام، وخاص رخصة تكون عادية، يعني ماشي استثنائية، وهاهي تباعت للنوطير وصاحبو، بالديروكاسيون وفهم تسطا. وحتى الوكالة رفضات ضواسا قبل ستة أشهر فقط ودابا تقبل دوصي مفخم وضخم.  كيفاش سير تقلب..؟؟

دابا الدولة حابسا الرخص الاستثنائية، وشي وحدين قال ليك باقين تايطيحو عليهم من الفوق، وفين المساواة ديال الناس والمستثمرين، وفين الفهامة ديال الوكالة الحضرية والجماعة والعمالة دإقليم النواصر والولاية، ولا تيحكرو غير على اللي معندو مظل يعني اللي معندوش من الفوق.

دابا خاص اللي قول لينا شكون هاد اللوبي اللي تيحكم من الفوق فالوكالة، ولا هادي غير هضرة باش يضمسو بيها بنادم.

بالمناسبة الكوميدي جاد المالح في العرض ديالو الأخير، ركز بزااف على هاد “من الفوق”، وعطاها معاني إضافية، وكيفاش تيستغلوها الناس باش ياكلو عقول عباد الله.

موضوعات أخرى

29/03/2024 06:00

العراقي لي حرق القرآن فالسويد علق لبلاد خرا.. غادي يطلب فيها اللجوء بعدما قررات ستوكهولم تجري عليه

29/03/2024 00:00

نقابة الصحافة زادت دروس أخرى على دروس “الهاكا” فقضية فبركة جريمة شفرة على المباشر.. كنبهو للانزلاقات الكثيرة لي كتوقع فعمل بعض الإذاعات الخاصة ويجب إعادة النظر فالقانون المنظم للقطاع السمعي البصري