كود الدوحة ///
هاد المنتخب المغربي اللي لاعب مونديال قطر حقق وكيحقق حلم لكل مغربي فالعالم. لمغاربة فبلادهم وخارج بلادهم ناشطين منتشين بالانتماء لهاد لبلاد. دارتها فرقة. داروها شباب شي ولد لبلاد وشي تزاد برا بعد ما تغربو والديه ولكن ما نساش منين جاي. لقاو هاد الجيل مدرب فاهمهم. داز من نفس التجربة اللي هو وليد الركراكي. هاد الشي اللي تحقق كان بفضل كذلك خدمة مسؤول اللي هو فوزي لقجع رئيس الجامعة. تقاتل وضارب علي اختياراتو.
https://fb.watch/hhxfTKTW6R/?mibextid=v7YzmG
ركز بزاف على الادارة الفنية والتقنية وقاد الجانب المالي ولكن باقي خاصو ينقي هاد البيت اللي عششات فيه رتيلة بعد سنوات من حكم العسكر من خلال حسني بنسليمان وبعدو الفاسي الفهري علي.
اليوم جامعة اخرى بروح اخرى فالكورة ولكن شفنا ديك اللي خدامة فشركة “اس تور” المكلفة بالنقل والاقامة واسمها نزهة غضفة. نعاودو من اللول. فكل وفد رسمي كيمشي فاي حدث رياضي او سياسي كيكون الرسمي. فهاد المونديال اللي هما اللعابة والادارة التقنية والفنية والمالية والادارية ورئيس لهاد الوفد. ما عمر مثلا يمشي وفد رسمي فزيارة رسمية ويكون اللي خدا المارشي فالنقل والاقامة وخدمات اخرى عضو فهاد الوفد.
الا فحالة هاد غضفة. هادي ماشي غير كتدخل للتيران ومن هادي 15 عام واللي كتحكم. هادي راه دابا تنتاقد فوزي لقجع فالجامعة وما تقربش ليها هي. حتى شي وحدين محسوبين على الرئيس كيدافعو عليها وبغرابة.
هادي يا سيدي فماتش التأهل ضد الصبليون دخلات عاود تاني للتيران فسطاد المدينة التعليمية. عنقات اللعابة بحال ايلى منهم. المدرب ها المدير المالي ها ….. ما بغاتش تخرج. دارت فيديو او دارو ليها فيديو كتوري اللعابة فيديو رئيس الدولة خارج فرحان لابس التوني مع شعبو فالرباط.
وشفتو الوقاحة فين وصلات. دابا هادي بحال شي حد كيجيب تريتور يخدم ليه وكيولي هاد تريتور يدخل ليه فالمالكة ويبان هو فالتصاور ويتسابق مع لعريس ولعروسة. هادا ما واقع لهاد غضفة.
ظهورها مع المنتخب مشكلة كبيرة. ما عندهاش الصفة تلبس حتى توني الوفد المغربي وما عندهاش الحق يكون عندها بادج يسمح ليها تدخل لهاد لبلايص. بقى ليها غير تجي دير ندوات صحافية وصافي.
صحابها اللي كيدافعو عليها فالجامعة وراهم معروفين٬ هما اللي خلاوها تعاود تدخل. نوع من التحدي. لمن؟ ما عرفناش.
كيفاش هادي مكلفة فشركة خدات مارشي المنتخبات فالنقل والاقامة كتركب فكار المنتخب. هادي ساكنة معاهم فنفس لوطيل. هاد الشي عبثي وبزاف.
راه من غير فوزي لقجع ما يمكن حتى حد يوقف هاد العبث. راه اللي حاطهم تماك بسباب مشاغلو بين الجامعة والوزارة كيدافعو عليها كثر ما كيدافعو على الرئيس براسو.
وقتاش يسالي هاد العبث. محتاجين لمرأة فالجامعة. تكون خدامة فالجامعة. هاد الشي غادي يغير العقليات ولكن ماشي وحدة واخدة مارشي. كتربح لملايير من خدمتها وحاضرة فكلشي.
هي ولا حتى هاداك العياشي ديال التغذية خاصهم يغبرو. المنتخب عندو ناسو. وحتى هاد العياشي تشكاو منو المصورين الصحافيين “فين ما نبغيو نصورو لقجع يطلع لينا. داخل فيه. غير يعنق. ويخلينا غير نصورو الرئيس ومن بعد يسلم”. هادا بلاصتو كوزينتو يحضيها. نهار الماتش يدخل كاع ڤي ڤي آي پي ومعاه حتى هاديك نزهة٬ ماشي مشكل٬ ولكن ما ينانوش فالتيران مع الاسود. يبعدو عليهم
