كود هناء ابو علي كازا ///

اللي كيوقع دابا فالشمال فضيحة وكبيرة بزاف. فضيحة للمغرب. فضيحة لكاع داك الشي اللي دارو المغرب باش يعطي صورة بلاد شادة طريقها. اللي خدا القرار باش يخلي للي بغى يدخل لسبتة من المضيق ولفنيدق والنواحي راه كيضرب فالعمق هاد البلاد.

دراري صغار وعيالات وعائلات كلها حارگة. واش بهاد الشي بغيتو الرأي العام الاسباني يضامن معانا ومع قضايانا. تصرف كيخلي صورة بلادنا صورة دولة كتبتز دولة جارة. حنا كبر من هاد الشي. حنا كنهدرو على المعاملة بالمثل وحسن الجوار والاحترام للسيادة والتعاون والندية.

شكون اللي طاحت عليه هاد الفكرة المتخلفة اللي ثمنها غادي يكون غالي وغادي يرجع علينا ببومزوي.

فالازمة المغربية الاسبانية على قضية استقبال ابراهيم غالي زعيم البوليساريو بباسبور ديبلوماسي جزائري وهوية مزورة٬ لعبناها مزيان. گاع اللي دارو المغرب كان بذكاء. الضغط عليهم وعلى القضاء واللعب فتيرانهم وتوظيف الاحزاب فهاد الشي. لكن هاد الشي اللي وقع اليوم ضرب كلشي بالزيرو.

دابا راه اللعب ماشي مع الصبليون بوحدها. راه مع الاوربيين. كنكثرو علينا العديان وكنقويو حجج اللي ديما ضدنا.

فاسبانيا هادي هدية واعرة لليمين المتطرف. لحزبو “بوكس”. هادي غادية تقويه. خطابو كولو بناه ضد المهاجرين وضد هجرة المغاربة. ما كرهوش يجيو على اللي كاينين تماك. دابا هاد التصرف دعم ليهم.

المجتمع الاسباني حتى هو كنخسروه. اعلامهم دابا كولو كيهدر على هاد الحدث غير المسبوق. هاديك الازمة على ود غالي حتى حد ما تسوق ليها فالاعلام السمعي البصري او تسوقو ليها ولكن باحتشام كبير تناولوها.

كنعطيو صورة بلاد فيها حرب اهلية او عايشة المجاعة باش كلشي يتطلق ويدخل لسبتة. حتى ناس هاد المدينة اللي كيعانيو من الازمة بعد اغلاق الحدود وبعد ما المغرب سد الديوانة٬ غاديين يكرهونا. بهاد التصرف ما غادينش نربحوهم كيف بغينا. ما غاديينش نحلمو باللي يولي تيار كبير فيهم باغي يرجع للبلاد.