مصطفى الشاذلي – كود سبور//
الكوكب المراكشي محكوم عليه باش ما يرجع يلعب فملعب مراكش الكبير، لحقاش مخلصش الديون لي عليه مند العام الماضي، ولي كتوصل إلى 370 مليون.
شركة سونارجيس طالبت إدارة الكوكب المراكشي بأداء 370 مليون، إلا بغا يرجع يستقبل فيه المنافسين ديالو.
الفضيحة هي أن الكوكب تمنع كذلك من الاستقبال بملعب الحارثي فمراكش. هاد الملعب لي تصرفات عليه 5 ملايير باش يرجع في حلة جديدة لكن السلطة المحلية ما كتبغيش ترخص للفريق باش يلعب فيه، لأسباب مجهولة.
فصيل الكريزي بويز دخل على خط الازمة واعتبر فبلاغو توصلت “كود” بنسخة منو، هادشي لي وقع الكوكب مهزلة كروية.
الكريزي بويز لم يكتف بالتعبير عن الغضب، بل هدد بتهيبج الجموعة ديالو لمواجهة مخطط تهجير الكوكب المراكشي إلى مدينة أخرى.
الكوكب المراكشي كيعاني من أزمة مالية خانقة. فبعد مطالب سونارجيس بمستحقاتها المالية، توصل الفريق بمراسلة من الاتحاد الدولي لكرة القدم فيفا كيطالبو باش يسوي وضعية الحقوق المالية، التي تخص انتقال ابو بكار كوناطي إلى لشبونة البرتغالي، إذ عليه أن يؤدي ما بدمته لفريق أسي باماكو المالي.
الكوكب المراكشي عانى مشاكل تسييرية وتقنية منذ الموسم الماضي، وهي لي خلاتو ينزل للقسم الثاني.