أحمد الطيب – كود الرباط //
فضيحة اشمن فضيحة، بطلها واحد كيظل يهضر ويدير فيها بطل الديمقراطية والدفاع عن الشعب والمقهورين فالبرلمان، هذا نور الدين مضيان، رئيس الفريق الاستقلالي للوحدة والتعادلية، لي قرر بطريقة غريبة يبلوكي أهم لجنة موضوعاتية على المخطط الأخضر، 10 سنين ديال هاد المخطط مهم يعرف شنو الايجابيات والسلبيات لي فيه.
مضيان لي ضغط باش يبقا رئيس مجموعة العمل الموضوعاتية المكلفة بتقييم السياسة العمومية حول مخطط المغرب الأخضر، فاش طار ليه المقعد وقاليهم خليو لي الرئاسة راه غادي نرجع لرئاسة هاد المجموعة، يعني كان فراسو راجع، وهو نفس الشيء لي قال الطالبي العلمي لأعضاء المجموعة فاش بغاو يبدلو مضيان ويبداو الخدمة.
وحسب تبرگيگة جابتها “گود” فإن أعضاء المجموعة قبلو يرجع مضيان، ولكن تصدمو فاش رجع قلب وجهو ومبغاش يخدم هاد المهمة الرقابية وتسبب في بلوكاج عمل هذه اللجنة النيابية.
دبا 4 شهور مشات من عمل اللجنة بقات غير شهرين، ميمكنش يديرو فيها تقييم لهاد المخطط الأخضر، هادشي كيعني بلي كاينا شبهات تواطؤات باش كولشي يوقف. فضيحة ل مضيان ولحزبو.
والفضيحة الكبيرة مضيان، قال لأعضاء المجموعة بلي غادي يأجل كولشي حتى يسالي المونديال بقطر، بطريقة مسيئة للعمل الرقابي، بحيث بان مضيان في منصة VIP بأحد مدرجات ملاعب قطر، وهو كيشجع المنتخب، ويتلقا معارف وصحابو والنافذين. مهم شي حد عرض عليه.
التقييم ديال المجموعة كيشمل مخطط “المغرب الأخضر” منذ انطلاقته في أبريل 2008 إلى اليوم، والوقوف على ما تحقق وما لم يتحقق، فضلا عن رصد الإيجابيات والسلبيات وتقييم الميزانية المرصودة لهذا المخطط وما إذا كانت كافية أم لا.
ويرتقب أن تعقد المجموعة الموضوعاتية المكلفة بمخطط “المغرب الأخضر” عددا من اللقاءات مع مختلف المتدخلين. كما ستقوم بزيارات ميدانية لعدد من الضيعات الفلاحية، وكذا الاستماع لملاحظات المهنيين، بمن فيهم أولئك الذين لم يستفيدوا من هذا المخطط لسبب أو لآخر.
وتنص المادة 119 من النظام الداخلي لمجلس النواب على أن مجموعات العمل الموضوعاتية تحدث بقرار من مكتب المجلس بمبادرة من رئيس المجلس أو بطلب من رئيس فريق أو مجموعة نيابية. ويشترط لإحداث مجموعات العمل الموضوعاتية المؤقتة أن تكون المهمة المسندة إليها تتعلق إما: باختصاص لجنتين أو أكثر من اللجان الدائمة، أو القيام بدراسات وأبحاث وإعداد تقارير لا يعود الاختصاص فيها لدور اللجان الدائمة التشريعي والرقابي. وتحال التقارير التي أعدتها اللجان الموضوعاتية إلى مكتب المجلس الذي يقرر في مآلها، وإذا قرر عرضها على الجلسة العامة يقوم بتعميمها على جميع أعضاء المجلس 48 ساعة على الأقل قبل مناقشتها بالجلسة المذكورة