كود الرباط//

فضيحة للوزير محمد بنسعيد، وزير الثقافة والشباب والتواصل، لي فضل العطلة وقت الخدمة ديال بصح لي كتكون عند الوزارة فالصيف خصوصا مع المخيمات الصيفية، بحيث عكس ما يروجه من تحديث وتنظيم للمخيمات فإن فيديو توصلت به “كود” يوثق لحظة فرض الصلاة بشكل جماعي على أطفال صغار بإحدى المخيمات الصيفية التي تدعمها وزارة الشباب والثقافة والتواصل، وذلك في مخالفة صريحة.

وحسب معلومات “كود” فإن هاد المخيم فالهرهورة باقي بالخيام على الطريقة القديمة، حيث فوق ارض تابعة للمياه والغابات.
فحسب مصدر “كود” فإن الجمعية سميتها “الطلائع” تابعا لحزب التقدم والاشتراكية، هي لي دايرا فالبرنامج الصلاة الجماعية داخل المخيم، واخا هادشي ممنوع بقوة القانون.

مصدر بالجمعية المغربية للتربية والطفولة هضر مع “كود” واستغرب فرض الصلاة جماعة على الأطفال، وقال لـ”كود” بلي جمعيتهم دازت من هاد المخيم فواحد الفترة، ومكيديروش لا الآذان ولا الصلاة، لأن هادو اطفال صغار خصهم انشطة والالوان باش يكون مرتاحين ومستعدين للموسم الدراسي المقبل .

هاد الفضيحة فعهد الوزير البامي، لي كيبغي تصاور ويبان فمواقع التواصل الاجتماعي، تؤكد بلي مكاين لي مسوق لوليدات المغاربة من التطرف فهاد المخيمات لي كتمول بفلوس الدولة اي بفلوس دافعي الضرائب.

الوزير غايب وفعطلة والمخيمات مكاين لي يراقبها، وهاد الفيديو فضح القرار الصادر رقم 1079.22، عن تفاصيل المعايير التقنية والشروط الواجب توفرها في مراكز التخييم التابعة للحكومة، الفيديو كيقول للقرار مكاين لي تسوق ليك.

فهاد القرار المنشور بالجريدة الرسمية، كاين ملحق خاص بتحديد المعايير التقنية وشروط الصحة والسلامة لي خصها توفر فمراكز التهييم التابعة للسلطة الحكومية المكلفة بالشباب، كيضهر على تفاصيل شنو خصو يكون فهاد المراكز من مطبخ وقسم خاص بالنفايات والملابس لي خاص العاملين يلبسوها وغير من الشروط الصارمة.

بغض النظر عن هاد الشروط لي كثيرة وكاينا فالقرار (صور)، فإن اهم ملاحظة جات فهاد القرار هو انه لم ينص على ان المساجد خصها تكون فهاد مراكز التخييم، يعني الاطفال مخصش يتم الضغط عليه فهاد السن الصغير بامور دينية.

الا ان الفيديو يؤكد كيفاش شي وحدين كيفرضو على الاطفال الصغار الصلاة بشكل جماعي. واش هذا مخيم صيفي ولا مخيم الرقة؟.
مصدر بالوزارة قال ان منسق المخيم تدخل وقاليهم لي بغا يصلي يمشي للجامع.