كود الرباط//

فظل الازمة الاقتصادية الخانقة وتأخر السلطات الحكومية في إخراج السجل الاجتماعي الموحد، الحكومة اختارت الحلول السهلة باش طفي العافيا لي شاعلة فالاسعار ديال الكتب المدرسية مع اقتراب الدخول المدرسي، بحيث علنات عن دعم الناشرين بـ25 في المائة فثمن الكتاب المدرسي المعني بالزيادة.

هاد الدعم غادي يشمل جميع الاسر المغربية، لي عندها فلوس ومرفحة ولي كتقري وليداتهم بـ7000 درهم فالشهر فالبريفي، وللي معندهاش وكتقري وليداتها بالريق الناشف فالعمومي.

فضيحة كبيرة غاتزيد ثقب ميزانية الدولة. خصوصا وان هاد الدعم جاي من صندوق المقاصة يعني من الضرائب ديال المغاربة ومن ثرواتهم الطبيعية (الفوسفاط).

فضيحة وغغادي تضيع على خزينة الدولة اموال كثيرة، وكيبقا السؤال شحال غادي يكلف هاد الدعم.

دبا بهاد المقاربة العجيبة لي دارت الحكومة، فالكتاب المدرسي ولا بحال البوطا لي فركعات ميزانية الدولة كيستفد منها لي مرفح واللي حازق..الحكومة مشات للحل السهل وطحنات الميزانية.

هادشي كيعني الزيادة في النفقات المشتركة للميزانية.كيعني زيد فرع صندوق المقاصة باش تربح السلم الاجتماعي لي مهزوز.

الحكومة مشات للحل السهل حيث مزال مخرجاتش السجل الاجتماعي، مع العلم ان الملك محمد السادس دعا في خطابه الاخير الحكومة بالتسريع في اخراج هاد السجل.

فضيحة وصافي..حكومة كتعطي فلوس للمرفحين باش يشريو بنفس ثمن الكتاب المدرسي مع الاسر الهشة.