كود الرباط =الصورة من البرلمان السويدي وهو الطويل يسار رقية الدرهم /////

التسريبات اللي خرجات على القائمة الكاملة تقريبا للسفراء تظهر تخبط الخارجية ووحلتها. من الاسماء المعنية شخص يسمى لحسن مهراوي من كلميم. هاد الشخص اللي كيشتغل استاذ ففرنسا اسس جمعية اسمها جمعية القبائل الصحراوية المغربية اوربا ودابا ولى ناطقها الرسمي. غير الاسم كيبين انها ما معروفاش ووسيلة الاعلام الوحيدة اللي يمكن كتابع اخبارها هي وكالة المغرب العربي للانباء.

طبعا باش نشوفو كيفاش كتخدم البوليساريو وكيفاش تخترق المجتمعات في فرنسا وفي اوربا كيبين باللي جمعيات بحال هادي كتعطي نتائج عكسية. مولاها ما معروفش فالصحرا ما عندوش المكانة اللي تخول ليه يتكلم باسم الصحراويين. هاد السيد ديما مسافر ديما داير. كيمثل المغرب وكيخطب فاللجنة الرابعة للامم المتحدة واخر مرة كان رفقة البرلمانية رقية الدرهم في السويد ودخل ندوة ما معروضش ليها باش يخرج ويدير منها بطل ويكولو فالمغرب اللي مازال يالله كلنا باسم الله فالديموقراطية ولا موحالش٬ يكولو راه ما كايناش الديموقراطية فالسويد. هاد التخربيق ديالو عطئ اكلو وتم تعيينه سفيرا للمغرب في ايرلندا.

دابا غير بيني وبينكم واش صحراوا المزيانين اللي خدامين بحال قنصل المغرب في لاس بالماس اللي تعين في الاوروغواي واللي حافظ الملف مزيان مزيان ثم عينو غلام ميشان في غينيا الاستوائية. هادو بجوج يستحقو ايرلندا لانها اعترفات بالبوليساريو ومشات بعيد فعلاقتها معاها وماشي بواحد بحال مهراوي اللي غادية تبدل نوقفها. باراكا من الهدايا وخاص التعيينات للناس اللي كيخدمو. كاينين ديبلوماسيين وكاينين ناس كيكررو نفس لكلام ما صالح لوالو.

فضايح التعيينات ماشي غير تعيين هاد مهراوي ولكن اللي كان فبلاصتو انس خالص واللي قرى مع الملك مادار والو. هاد الشي علاش خاص التعيينات تكون بالكفاءة ماشي مكافئة لصحابهم