الرئيسية > ميديا وثقافة > فضايحنا. كيفاش الدولة حيدات وزارة الاتصال وكاين مجلس وطني للصحافة ووفد مشى للصين وكيقودو ناطق رسمي سابق للحكومة
07/12/2019 15:00 ميديا وثقافة

فضايحنا. كيفاش الدولة حيدات وزارة الاتصال وكاين مجلس وطني للصحافة ووفد مشى للصين وكيقودو ناطق رسمي سابق للحكومة

فضايحنا. كيفاش الدولة حيدات وزارة الاتصال وكاين مجلس وطني للصحافة ووفد مشى للصين وكيقودو ناطق رسمي سابق للحكومة

كود هناء ابو علي ///

فضيحة الوفد الاعلامي اللي مشى للصين كبيرة. غادية تكون عندها تبعات ففيدرالية الناشرين المغاربة وشوهة للبلاد. هاد الوفد اللي قادو كمال لحلو رئيس الفيدرالية المغربية للإعلام واللي تحكم فكلشي. اختار كلشي. هادي فضيحة اخرى.

المهم ان كمال لحلو اللي ما عند فيدراليتو حتى مقعد فالمجلس الوطني للصحافة المنتخب ولى كينظم اللقاءات وناطق باسم كاع الناشرين. جاب الناطق الرسمي باسم الحكومة سابقا مصطفى الخلفي ودارو على رئيس الوفد. كيفاش قبلو ناشرين هاد الشوهة؟ هادي هدرة اخرى.

المشكلة لكبيرة ان هاد الوفد كان الهدف ديالو يشوف كيفاش كطور الصين فالانترنيت ويطل على تجربتها الصحافية واخا هي دولة كتكره حرية التعبير ودايرة حصار بل اقرب للادانة لمسلميها. دابا ولى الخلفي كيهدر باسم المغرب.

فلقاء هاد الوفد بمسؤول صيني رفيع بوزارة الخارجية الصينية الثلاثاء الماضي بمقر الوزارة في بكين قال رئيس الوفد اللي قدماتو وكالة المغرب العربي للانباء انو٬ وزير الاتصال والعلاقات مع البرلمان والمجتمع المدني والناطق الرسمي باسم الحكومة السابق، أن “مع السيد جيانغ فينغ، نائب مدير مديرية غرب آسيا وشمال إفريقيا بوزارة الخارجية الصينية، كان مهما للغاية، حيث تم التنويه بالزيارة الملكية السامية لصاحب الجلالة الملك محمد السادس لجمهورية الصين الشعبية في سنة 2016، وما اثمرته من شراكة استراتيجية بين المغرب والصين متعددة المجالات، اقتصادية وسياسية واجتماعية وثقافية”

وزاد قودها باش بدا يهدر “تم بهذه المناسبة تجديد الشكر لقرار جلالة الملك بإعفاء المواطنين الصينيين من التأشيرة، مما انعكس إيجابا على مستوى تدفق السياح الصينيين في اتجاه المغرب وما يحمله ذلك من آفاق واعدة بالنسبة للتعاون في هذا القطاع”

وشي تخربيق اخر. السيد صحاب راسو فمجلس الحكومي ولا فلقاء رسمي والحال انو مع ناشرين صحافيين فدولة عندها حرية ولو نسية هي المغرب بل هاد الدولة قررات ان كل ما عندو علاقة بالصحافة ما يبقاش فيدها وعندو مجلس وطني منتخب. بغض النظر اش وقع فهاد الانتخابات ولكن راها مؤسسة رسمية دابا.

كيفاش فهاد الوضع اللي قبلنا مجلس وطني يمثل الناشرين مسؤول حكومي سابق اللي ما دارش الشي لكبير للصحافة ومازال العقوبات السالبة للحرية موجودة ومازال اعتقال الصحافين فعهدو. فضيحة وصافي.

لو ان المجلس الوطني للصحافة هو اللي رأس هاد الوفد معقولة. واخا علاش اصلا يكون رئيس. راهم بريوسهم رؤساء.

المسؤولية كيتحملوها اللي مشاو فهاد الوفد وكتحملها فيدرالية الناشرين المغاربة وكيحملها كمال لحلو اللي كيلعب فتيران ماشي ديالو.

دابا هاو غاديين يبقاو يهدرو باسم المغرب حتى يوم 10 دجنبر. وشكون كلفهم؟ كمال لحلو

موضوعات أخرى

29/03/2024 06:00

العراقي لي حرق القرآن فالسويد علق لبلاد خرا.. غادي يطلب فيها اللجوء بعدما قررات ستوكهولم تجري عليه