كود الصويرة//
نشرت عمالة الصويرة إعلان عن طلب عروض مفتوح لأشغال تهيئة القاعة الكبيرة للاجتماعات ديال عمالة الصويرة.
القيمة ديال هاذ الصفقة هيا 265 مليون سنتيم. زائد 65 مليون لتجهيزها مع العلم ان مساحتها لا تتجاوز 500 متر.
هاذ القاعة باقة جديدة كلشي فيها جديد الأرضية رخام، الاسقف فحالة جيدة والمرافق و الإنارة و الصوت لانه ببساطة يلاه هاذي خمس سنين باش تعاودات.
فهاذ الأزمة اللي كتعيشها لبلاد من المفروض هاذ المبلغ يمشي لشي مستوصف للقرب او شي مرفق اجتماعي مهما كان بسيطا يستافدوا منو الناس .
الناس فالاقليم كتقطع كيلومترات وكتمشي لساعات باش تجيب الما و هاذ الفلوس من الأولى تستثمر فشي مشروع ديال الابار.
بحال هاذ الاختيارات هيا اللي كتقلق المواطنين والشباب اكثر داكشي علاش مدينة بحال الصويرة ولات كتعرف عمليات ديال الحريك و الهجرة غير الشرعية اللي غي مؤخرا شارك قرابة 100 شاب اختاروا المغامرة بحياتهم من أجل لقمة عيش.
