كود – هناء ابو علي //

مزيان الواحد يعتارف بخطئو. فرانسا دارتها. البارح وشحات مصطفى التراب، الرئيس المدير العام للمكتب الشريف للفوسفاط، بوسام “جوقة الشرف الفرنسي برتبة ضابط”.

الحفل دار فسفارة فرنسا بالرباط لاربعا اللي فاتت وقدماتو ليه سفيرة فرنسا بالمغرب هيلين لوكَال.

الغريب فالبيان اللي دارت فرانسا انها قدمات الوسام على انو احتفاء بمسار التراب وتتويج للتعاون النموذجي مع فرنسا.

هاد فرانسا كانت دارت يدين ورجلين وضغطات على المغرب بزاف ايام كان ساركوزي رئيس باش التراب ما يبقاش فالفوسفاط. اييه. كانو حاربوه بزاف واعتابروه ضد مصالح الجمهورية الفرنسية.

طبعا هاد الحرب اللي دارو ليه كانت حرب من ناس هنا فالمغرب ليه.

دابا دازت سنوات طويلة عاد اعتاذرو ليه واعتارفو باللي كانو غالطين وباللي السيد كيدافع على مصالح بلادو المغرب ماشي مصالح فرانسا او امريكا