كود كازا ///
دابا غير شرحو لينا نفهمو. هاداك سفيان بحري اللي خاصو يكون يتحاكم على الاقل بسباب قضية اغلاق المدن بسباب كورونا ايام العيد لكبير واللي كان كيهدر باسم محمد السادس من خلال صفحة منتحل صفة فيها٬ هاد الامي المتخلف دار صورة مع هشام العلوي ولد عم الملك. ماشي المشكل هو هادا بل اش كتب. قال “مع إبن عم ملكنا صاحب السمو الأمير المثقف والفريد مولاي هشام في إقامته الخاصة بمدينة الرباط” اييه. هشام العلوي ما بغاش اولا يكون امير وقالها كثر من مرة. ثانيا هاد الصفات ديال “المثقف الفريد” ماشي هو رأي جهات فالدولة. ديما مصورينو كيف قالت مرة “جون افريك” وحنا عارفين شكون اللي كيقول ليهم يكتبو “الامير اللي بغى يكون ملك”.
هاد المتخلف كتب باللي خصو الامير باستقبال “متميز” وباللي دوز معاه ساعات واكتشف انو “إنسان جد متواضع وقلبه طيب ونظرته ثاقبة، شريف إبن الشرفاء، وعكس ما يشاع عنه، يريد الخير لوطنه ويدافع على كلمة الحق ويحب كثيرا إبن عمه جلالة الملك سيدنا نصره الله”. هاديك عكس ما يشاع عليه غريبة وبزاف.
اش من جهاز كيقصد وشكون هادو اللي شاعو عليه وعلاش قلز ليهم هاد المتخلف من تحت الجلابة.
من لحوايج المثيرة فهاد اللقاء هو ان هاد الامي باش يمشي عند هشام العلوي خاصو اذن. شكون عطاه ليه. هادا كيهدر علي امير مثقف ولكن ايلى استقبل امي بحالك ما بقات ثقافة. هادي حاجة اخرى. واش هادا عندو شي راس باش يتكلم فامور كبيرة عليه. هادي اهانة لكلمة “مثقف” اللي وصف بيها هاد بحري الرجل اللي ما بغاش يبقى امير.
دابا كاينة امور ما مفهوماش. كيفاش جهة فالدولة كتضرب هاد الامير وهادا جا كيدافع عليه ويتهمها باللي كتنشر عليه اشاعات وصافي وباللي زوين.
هشام من حقو يكون عندو راي ضد ولد عمو وينتاقدو وهاد الشي كيبان فكتبتو فكتبة ناسو اللي كيخدمو معاه مشروعو غير اللي ما مفهموش اش دخل هاد الامي فهاد الشي.