كود سبور//
من 2004 موصلناش لنصف نهائي ديال كأس إفريقيا، ودوزنا مرحلة مظلمة من الخروج من الدور الأول إلى غاية 2017، سيناريو غير مفهوم لبلد كروي وعندو تقاليد راسخة ديال الرياضة الأكثر شعبية فالعالم، سيناريو عصي على التحليل التقني وحنا كاملين كنشوفو بلدان أقل منا لا إمكانيات ولا عناصر بشرية دارت مسارات حسن منا على الأقل خلال هذه الفترة.
ايلا كانت النكبات ( باش ميكعاش لقجع) ديال نسخة 2019 ولا تا كأس العرب الأخيرة واخا مشي فنفس المرتبة، هرسات الأمال ديال المغاربة فأننا نمشيو بعيد فهاد لا كان، ونحبسو من ترشيح المغرب باش ياخد الكأس قبل مايلعب ( وهو أمر محمود ) فتاحاجة أيضا مكتمنع المغرب من أنه يمشي لأبعد نقطة فهاد الكأس بالمجموعة اللي عندو.
— Équipe du Maroc (@EnMaroc) January 8, 2022
لعب المغرب إقصائيات كأس إفريقيا والعالم بطريقة دفاعية وتحفظ كبير، ولكن بنجاعة فالهجوم وماشي عقم سلبي، هادا هو أسلوب وحيد اللي كيخدم على لياقة اللاعبين بزاف وهادي نقطة إيجابية بالنظر لظروف اللعب فإفريقيا وظروف كاس كتلعب فمدة محدودة.
المغرب أيضا عندو مواهب شابة اللي بعض المنتخبات الإفريقية غتكتشفها لأول مرة، بحال ريان مايي وإلياس الشاعر وعمران لوزا، وهي عناصر كولها جاية عندها هدف ديال إثبات الذات والرغبة فأنها متقارنش باللاعبين اللي تم التخلي عليهم من حقبة رونار.
اللاعبين الشباب اللي عندهوم الدافع كانو سبب رئيسي فأن المغرب يدير كاس إفريقية واعرة ف 2004، وكاين أوجه تشابه بزاف مع هاد المنتخب والظروف فاش مشى للكأس مع منتخب الزاكي.
Focused ???????? pic.twitter.com/GPF2z65cvq
— Équipe du Maroc (@EnMaroc) January 5, 2022
المغرب عندو أشرف حكيمي، اللاعب world class اللي تيقدر يحسم ليك الماتش بانطلاقة ولا هدف، وحكيمي فهاد الكأس بالخصوص عندو إثبات ذات حقيقي مع المنتخب و confirmation ديال الأداء اللي كينتظرو.
وعندو ياسين بونو من أفضل حراس العالم فالوقت الحالي، وقدام القائد سايس اللي وصل للنضج الكروي التام ديالو ومتحمس يدير كأس إفريقية فالمستوى العالي.
طبعا كاين السلبي اللي ممكن يعترض المنتخب فهاد الكأس هو افتقادو للتجربة خارج الميدان خلال السنة الماضية، ومنذ تولي وحيد قيادة المنتخب.
كورونا كدور، والمهم هو حماية المنتخب من المرض لأن المنتخب اللي غيربح هاد الكأس هو اللي غيحمي المجموعة ويوصل للنهائي بدون إصابات والمضاعفات ديالها.
???? Second training session in this first day in Yaoundé! ☑️ pic.twitter.com/TbNYJ7e0cG
— Équipe du Maroc (@EnMaroc) January 3, 2022
مرونة وحيد التكتيكية مشكل يقدر يواجه المغرب، لأن وحيد ماشي مدرب كؤوس ومعندوش نتائج كبيرة فيها ومبرهنش أن عندو الحلول السريعة باش يخرج من الماتش بالإيجاب. وحيد مدرب كلاسيكي كيخصو الوقت باش يدرس اللعابة، وعندو مجموعة كيتيق فيها وكيعتبرها الأساس، وفبعض الماتشات اللي كتكون سريالية ( راجع المغرب و البنين ) الشطارة ديال المدرب هي اللي كتخرجك منها، هاد النقطة محل شك كبير عند وحيد، ونتمناو يتجاوزها ولا يكون عند مصطفى حجي المساعد ديالو تدخلات موفقة فالوقت المناسب.
والأهم واللي مخاصش ينساه أي واحد أن قليل فين شي منتخب ربح شي كاس كيما كانت وهو كيكتسح كولشي ب 5 و 6. الكأس فيها نصيب كبير ديال الحظ اللي بكل بساطة معمرو مكان معانا فهاد التظاهرة من نهار بدينا كنلعبو فيها، شحال من منتخب كيغلط وكيدوز المقابلات ديالو بسلام، حنا كنغلطو كنتعاقبو تم نيت، القدر ديال هاد المنتخب أن الكرة تعكس ليه فإفريقيا والسبب غريب وعجيب.
حنا ممرشحينش ولكن نقدرو نربحو الكأس، وديما مغرب.
To Yaoundé ???????????? pic.twitter.com/P4TR1dEOk4
— Équipe du Maroc (@EnMaroc) January 2, 2022
