سهام البارودي – كود//

فاش كان النقاش على واش المغرب قادر و لا ماقادرش ينظم كأس العالم كنت ديما كانقول مع راسي واي نوت؟ علاش لا ؟! نظموا باباه !
كاينقز عقلي كايقوليا ايه و التيرانات ؟
كانجاوبو
نبنيو باباهم
و السبيطارات ؟
ايوا هادي هي المناسبة باش نبنيو باباهم
ايه واخا ! و الطرقان و لوطيلات و كدا …
كانعاود نسنطح راسي و كانقوليه ” و مالها  ؟”
كاينقز عاوتاني عقلي كايقوليا
من نيتك ؟
كانجاوبو مالها شنو فيها ! و كانتسرسب عليه بديك الهضرة ديال العزيمة كاتحقق المستحيل ! و quand on veut on peut و كدا كداشي

حتى كتاب عليا المكتوب و مشيت نتفرج فالماتش بين البارصا و سيفيلا مؤخرا فطنجة و ياريتني مامشيت !

حيت اولا تخورت اكبر تخويرة فحياتي ! و لقيت راسي- وسط بزاف ديال الناس لي تاهوما تخورو نفس التخويرة ! گاع لي شراو التيكي من الموقع ديال نادي برشلونة بثمانين اورو باش يكونو فالدرجة الاولى ! لقاو راسهم مليوحين فالدرجة الثانية مع الناس لي مخلصين خمسمية درهم !
و فاش كاتتشكى لناس برشلونة كايقولو ليك هادشي لي عطاتنا الجامعة ! يعني عملية نصب من الطراز الرفيع ! تخلويضة كبيرة ! باش تبيع للناس تيكي على اساس انه ديال كاطيغوري و يلقاو راسهم فكاطيغوري اخرى !

– ثانيا: سوء التنظيم !
تيران كامل على قدو مافيهش قرعة ديال الما ! يعني لاجاك لعطش بقا تما ! تيرانات العالم كامل فيهم الاكل و الشرب و حنا گالس  فتيران فحالا گالس وسط صحراء دارفور !

ثالثا : و اهم حاجة العقليات ديال الناس لي مازال ماوعاوش بأهمية احترام الغير ! مازال بنادم عندنا كايعفط على مقاعد مخصصة لجلوس اشخاص اخرين باش يدوز و يدرم فيك كي البغل ! مازال بنادم ماواعيش بأنه خاصو يجلس فالنمرة ديالو و كايحاول يهرف عليك لاعندك بلاصة  احسن !
مازال كايلوحو الوسخ و الزبل فالارض !

رابعا: غانشوف شخص كايجر لاعب كبير فحال ميسي وسط المنصة الشرفية قدام الوزراء ديال سبانيا و المغرب و من بعد غادي نعرف انه ماهوا شي مسؤول سياسي و لا رياضي غير راجل عادي و لكن حيت كايعرف بنادم نجح يوصل لديك البلاصة و يدير ديك الشوهة.

هادشي لي وقع ليا فهاد الماتش خلاني فعلا نفقد الامل اننا قادين نظموا حدث ككأس العالم ! حنا نقدرو نظموا كاس العالم و لكن ماشي ديال الكورة ! ديال التصنطيح ! و دفيع الجبهة ! و التخلويض !

حيت باش فألفين و تمنطاش نشري تيكي بثمانين اورو و تقوليا عليه راه ديال البروميار كاطيغوري ! و تجي تخورني و تعطيني دوزيام ! هادشي فيه ريحة  شي گاميلة حامضة ! !

مازال عندنا أشواط و اشواط خاصنا نجتازوها باش نوصلو لمرحلة تنظيم حدث فحال كأس العالم لي نستقبلو فيه الناس من انحاء العالم و نسكنوهم و نوكلوهم و نشربوهم و نداويوهم لا مرضو و نعتقوهم لا طاحو فشي مشكل !

هاد الساعة نكتافيو بتنظيم التورنوات ديال رمضان و رحم الله عبدا عرف قدر نفسه.