سهام البارودي – كود//

فاش كادوي مع شي بوزبالي على الحريات و الحقوق الفردية كايجاوبك ديما بواحد الجملة باص بارتو ” ولكن حنا دولة اسلامية آ خويا ” ” و لكن حنا دولة محااااافظة آ ختشي ” و كايغلض مزياااان ديك الضاد ديال محافظة باش يخلعك بيها زعما راه قضاها بديك “موحافييظااا” فحالا كايصنع البينيسيلين!

ولكن اي واحد كايطل على الطوندونس ديال اليوتوب غايبان ليه بلي ماكاين لا محافظة لا تاخرية ! لي خالقين الحدث فاليوتوب هوما يوتوبورات معريين على الحياة الخاصة ديالهم للعموم ! هانتوما شوفو بيتي ديال النعاس ! هاشنو كاندير انا وراجلي مورا الثمنية ! آجيو تشوفو معايا الحمام ديال داري ! آجيو تشوفو ولادي ! لدرجة انه حتى المدابزات بين العائلات و الخصوصيات العائلية ولات مادة لللايفات فاليوتوب و انستغرام و هادشي كلو علاش ؟ على عومار ! الگرمومة ! ميمي !

ميمي المسخوط ! السالب العقول ! معري الحقيقة و معري ترامي عباد الله خلا داك الوهم ديال ” المحافظة” يبان بلي غير وهم و كذبة كانو كايكذبو بيها عباد الله على راسهم ! و بلي دوك الرجال لي كانو شحال هادي كايقولو ليك ” آ لا انا مراتي ماتعراش قدام البراني ” و ” لا انا داري مايشوفهاش البراني” ولاو هوما براسهم اليوم هازين الكاميرات و كايصورو المدام كاتشلبخ فلابيسين فمراكش و كايديرو ليها المونطاج للفيديوات فيوتوب ! و هاكا ماجات تموت مهنة ” بوال الشيخات” حتى تزادت مهنة اخرى بلاصتها سميتها ” بوال اليوتوبوزات” و لي غالبا كايكون “راجل المرا”.

هادشي خلاني نسول راسي ! شكون هوما المغاربة لي كايگولو على راسهم محافظين ؟ حيت بانت ليا الگرمومة هي لي كاتكونديسيوني هاد القضية ! واش المغربي محافظ بعدا ؟ و لا كايكون محافظ غي فاش كايكون حازق و غي كايبدا يذوق حلاوة الفلوس كايولي مستاعد يتخلى على الافكار القروسطية ديالو و يخلي لمرا تشد زمام الأمور و دير لي بغات؟