عفراء علوي محمدي- كود//

كانت علاقة الممثل المصري الراحل حسن حسني مع المغرب متوترة بشكل كبير فواحد الفترة، وتحديدا فسنة 2015، فاش تسرب ليه فيديو مع واحد صاحبو سعودي، كيقلو فيه بللي بغا يتزوج ويدوز شهر العسل فالمغرب، فجاوبو حسني وقال ليه: “علاه كاين شي واحد كايمشي للريسطو ومعاه سوندويتش؟”

هذ العبارة شعلات مواقع التواصل الاجتماعي، بزاف ديال النشطاء المغاربة اعتبروها استهزاء بالمغرب وإهانة ليه، حيت الممثل المصري وصف المغرب ب”المطعم الجنسي”، والقبلة الأولى ديال السواعدة اللي كيجيو من أجل المتعة الجنسية.

الممثل المصري ماتعطلش بزاف باش يخرج يوضح موقفو للناس، ويصحح داكشي اللي فهموه نشطاء العالم الافتراضي، بحيث قال فحوار ليه على قناة مصرية “أنا ما قصدت حتى شي إساءة، بالعكس أنا اعتبرتو مطعم حيت فيه أجمل النساء، وولدي انا كنت وصيتو باش يتزوج مغربية، وانا علاقتي طيبة مع المغرب وشعب المغرب اللي كنبغيه بزاف”.

نقابة الفنانين المصريين حتى هي بلا عكَز عليها خرجات دارت بيان، كتوضح فيه بللي الفيديو ديال حسني ماكانش فيه تصريح مسؤول، بل مجرد دردشة مع صديق، وماكان كايدل على حتى شي إساءة مقصودة، خصوصا وأن حسني “كيحترم المغرب وكيقدرو، واحترامو للشعب المغربي لا يتطلب مزايدة، وهو كان تكرم فيه مرات كثيرة وحضر لمهرجانات المغرب السينمائية”، حسب بلاغ النقابة.