هناء ابو علي كود ///

بحال ايلى المصائب حالفة حتى تجمع علينا. كلها جات فوقت واحد. باش بان اختفاء الطفل عدنان٬ 11 سنة٬ فطنجة نسينا همومنا. مشاكلنا مع الجايحة. ارتفاع عدد القتلى بسباب كورونا. الاصابات اللي بدات كتفوت 2000. ضحكة عدنان ابتسامتو مسات كل مغربي. خلات الامل فالعثور على الطفل حي يكبر. بحال ايلى هاد الامل شكل من اشكال مواجهة الحالة الخايبة اللي كنعيشوها مع كورونا. 

جا بيان المديرية العامة للامن الوطني البارح فالليل. فيه باللي تم توقيف شاب عندو 24 عام خدام فالمنطقة الصناعية للاشتباه فتورطو فارتكاب جريمة قتل عدنان بعد اغتصابو وبعد هاد الشي دفنو فبلاصة قريبة للحي. خمسة ايام باش تحطات الشكاية حتى لقاو المتهم الاول. 

لخبار ما كانش صادم للمغاربة. كان اكثر. زلزال. اللي عرفو لخبار فالليل اكيد بزاف فيهم ما نعسوش. ما قدروش يصدقو نهاية اكثر مأساوية للطفل عدنان. حتى اللي نعس فيهم اللي عاش كوابيس. كلشي مفجوع.

طبعا كورونا والحالات والوفيات وكاع اللي واقع فالبلاد ما بقى عندو قيمة قدام خبر مفجع بحال نهاية عدنان. 

اللي عندهم اطفال عاشو الفاجعة بطريقة مختلفة. كثار فيهم غاديين يكونو عنقو ولادهم اللي فسن عدنان او قراب من سنو وبكاو بلا ما يعرفو هادوك الاطفال سبب هاد البكاء. 

مقتل عدنان بهاديك الطريقة الوحشية حسب اولى معطيات التحقيق٬ فيه حاجة اخرى اكثر صدمة وهو اللي متهم بهاد الجريمة شاب عندو 24 عام. 

كثار بزاف فطنحة وفالمغرب اللي كيقولو هاد الوحش خاصو الاعدام. النقاش على الموضوع كيتعاود. حالة بحال هادي اكيد ضربة للمدافعين على الغاء عقوبة الاعدام٬ غير الصدمة اللي ما لقيناش ليها وصف٬ هو راه مول الجريمة شاب. كيعطي صورة على نوع من الشباب اليوم فالمغرب. كيعطي صورة على التحولات العميقة اللي وقعات حتي فحياتنا الاجتماعية فالاحياء. امور كثيرة تغيرات وما واكباتهاش تصرفات العائلة المغربية: شكون ساكن فالحي فالدرب وواش ممكن دير ثقة وتخلي ولدك فيه وكيفاش تقدر تيق فجارك وواش كتعرف هاد الجار. 

تفاصيل صغيرة ممكن تنقد حياة امثال عدنان. رحيلو المفجع خاصو يفيقنا على حوايج كثيرة بزاف. ولكن دابا وقت بكاء هاد الطفل. صورة ضحكتو غادية تبقى تابعانا كلنا