عفراء علوي محمدي- كود//
بعد إدانة الصحافي سليمان الريسوني، قال محمد آدم، المشتكي فالملف، والناشط فقضايا مجتمع “الميم عين”، أنه ماشي انتقامي بطبعو، وهذ الحكم بالنسبة ليه منصف، كيف صرح أنه مؤمن بالقضاء، وحتى كون تحكم على الريسوني بالبراءة كان يتقبل الأمر.
وزاد آدم، فتصريحو ل”كود”، أن هجمات التخوين والتشهير ضدو مازال مستمرة للآن، من طرف أنصار الريسوني اللي كيعتبرو القضية سياسية، فيحين كيقول انه ملف عادي لمواطنين مغربيين، معروض أمام القضاء.
وهذ حملة التضامن كانت من بين الأسباب اللي خلات آدم، على حساب ماقال، مايقدمش شكاية بالريسوني فالوقت: “هذي كانت أول حاجة جاتني لبالي، وهذ السيناريو هو اللي وقع، حيت كيفما كان الحال، وكيفما وقع فقضايا أخرى، غيتم تأويل القضية، ونفس الوجوه اللي كيبانو ديما غيعاودو يبانو، ويتم تسييس الملف من طرف اللي كيدعيو الحقوق…”، على حد تعبيرو.
وأكد آدم أنه كيعرف ناس ضحايا حقوقيين معروفين، لكن ماقدروش يتوجهو للقضاء ويتابعوهم حيت خافو من حملات التضامن مع المتهمين والتشهير اللي ممكن يتعرضو ليه، وقال ان هذ التكتيكات السياسية صبحات معروفة، وكاينة فكَاع القضايا، لكن الصحافي والحقوقي ماشي منزه عن الخطأ وماشي فوق القانون.
وحول شي وحدين اللي سولو آدم واش كيجيه النعاس بالليل، قال: “صراحة ما كنعسش مزيان غير بسباب التشهير اللي كنتعرض ليه والهجمات والتكذيب والتخوين، أما فيما يتعلق بالقضية ضميري مرتاح إلى اقصى حد، وعارف ان داك السيد ماظلمتوش، ووسائل الإثبات اقتنعات بيهم المحكمة باش تصدر الحكم”.
وقال المشتكي بالريسوني أن أنصار هذ الأخير استغلو غيابو إعلاميا، واعتمدو التوغل ديالهم فالمجال الحقوقي، باش يمررو مغالطات، وقحمو موضوع المثلية الجنسية ديالو فالملف، فيحين هو كيتعبر الميول الجنسي والجندري بعيد على هذشي، وهذا ملف عادي معروض على القضاء.
وفرق آدم بين قضية المثليين والعابرين فالمغرب وقضيتو مع الريسوني: “الانتصار فهذ القضية ماكيعنيش أن القضاء انتصر لقضية مجتمع “الميم”، لا طبعا، لا ننكر الواقع، نحن نعرف أن القانون ماكينصفناش نحن كأقلية، ولكن شنو علاقة هذشي بالقضية؟ انا فاش وقفت قدام القاضي قلت ليهم بللي انا أقف امام مجلسه الموقر كمواطن مغربي، بدون أي اعتبارات أخرى أو مزايدات اخرى، ماقلتلوش أنا مثلي وخاصكوم تاخدولي حقي على هذ الأساس، مواطن مغربي وصافي”، على حساب هضرتو.
واستنكر نشر سكرينات ليه من اجل التشهير بيه، وقال أن فيها غير “جزء من الحقيقة وماشي الحقيقة كاملة”، وأكد أنه بإمكانو ينشر حتى هو محادثات، وتفاصيل الواقعة فالفايسبوك، لكن ترفع على هذشي اللي سماه “تبرهيش”، حيت “ماكاين لاش ننشرو غسيلنا أمام الملأ”، كيف قال.
وبخصوص إضراب الريسوني على الماكلة، صرح آدم انه كيتمناه يوقفو: “أنا من ديما، ولحد الساعة، قلت أنني كنتمنى من سليمان الريسوني يوقف الإضراب ديالو عن الطعام، حيت عندو وليد صغير مازال محتاجو ربما، وعندو ناس ناشدوه بزاف، بحال شخصيات حقوقية وسياسية وغيرها، لهذ الاعتبارات كنتمنى يوقفو، وفنهاية المطاف راه القضاء اللي عندو الكلمة الفصل فالقضية ماشي أنا أو هو”.
وكشف أنه كان ممكن يتنازل للريسوني لو اعترف بالذنب ديالو، وكان ممكن يكون حوار، واخا فالمسألة الحقوقية ماكايناش المساومة فيها كيف قال، ولكن يقدر يدير هكذا غير من منطلق إنساني.
وتدان الريسوني ابتدائيا بتهم هتك العرض والاحتجاز فحق الشاب آدم، وتحكم عليه ب5 سنوات ديال الحبس وتعويض 10 مليون سنتيم.
